(វ៉ាស៊ីនតោន)៖ ប្រធានាធិបតីសហរដ្ឋអាមេរិកលោក ដូណាល់ ត្រាំ បានថ្លែងថា សហរដ្ឋអាមេរិកកំពុងតែពន្លឿនការអភិវឌ្ឈ ថ្នាំព្យាបាលជំងឺ COVID-19 ឲ្យបានកាន់តែយ៉ាងសកម្ម រួមមានទាំងការដកពិសោធន៍លើថ្នាំ ប្រឆាំងនឹងជំងឺគ្រុនចាញ់ (hydroxychloroquine) និងវិធីព្យាបាលតាមរយៈឈាមផ្សេងទៀតផងដែរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ នាព្រឹកថ្ងៃចន្ទ ទី៣០ ខែមីនា ឆ្នាំ២០២០។

នៅក្នុងសន្និសីទសារព័ត៌មានមួយ នៅឯសេតវិមាន លោកប្រធានាធិបតី ត្រាំ បានគូសបញ្ជាក់ថា ថ្នាំអ៊ីដ្រុកស៊ីក្លររ៉ូឃ្វីន (hydroxychloroquine) ដែលជាថ្នាំប្រឆាំងនឹងជំងឺគ្រុនចាញ់ កំពុងត្រូវបានដាក់ប្រើប្រាស់ លើអ្នកជំងឺចំនួន ១,១០០នាក់នៅក្នុងរដ្ឋញូយ៉ក ដោយផ្សំជាមួយនឹងថ្នាំ ហ្សិតផេក (Z-Pak) ដែលជាថ្នាំម្យ៉ាងប្រឆាំងនឹងពពួកបាក់តេរី។

តែទោះជាយ៉ាងណា លោកប្រធានាធិបតីបានសង្កត់ធ្ងន់ថា «វាដូចជាលឿនពេកក្នុងការសន្មត់ថា ប្រសិទ្ធភាពរបស់ថ្នាំនេះវាយ៉ាងមេចនោះ ព្រោះវាទើបតែបានចាប់ផ្តើម ដាក់ឲ្យប្រើប្រាស់តែពីរថ្ងៃកន្លងមកនេះប៉ុណ្ណោះ។ យើងនឹងរង់ចាំមើលលទ្ធផលទាំងអស់គ្នា»។

ទន្ទឹមគ្នានេះលោកប្រធានាធិបតីក៏បានបន្ថែមទៀតថា រដ្ឋបាលចំណីអាហារ និងឱសថរបស់សហរដ្ឋអាមេរិក (FDA) ក៏ត្រូវបានអនុញ្ញាតឲ្យប្រើប្រាស់ជាបន្ទាន់ នូវការព្យាបាលដែលទាក់ទងនឹងឈាមដែលហៅថា ប្លាស្មា (convalescent plasma) សម្រាប់ការព្យាបាលអ្នកជំងឺធ្ងន់ធ្ងរផងដែរ។ ទាក់ទងនឹងការព្យាបាលដោយ «ប្លាស្មា» នេះ គឺគេយកប្លាស្មាឈាមពីអ្នកជំងឺ ដែលជាសះស្បើយរួច មកប្រើប្រាស់ដើម្បីបង្កើនប្រព័ន្ធភាពស៊ាំ របស់អ្នកជំងឺដទៃប្រឆាំងនឹងជំងឺ COVID-19 ហើយលទ្ធផលជាបឋមគឺវាល្អណាស់។

លោក ដូណាល់ ត្រាំ ក៏បានប្រកាសផងដែរថា គោលការណ៍ណែនាំ ស្តីអំពីការរក្សាគម្លាតពីគ្នា (social distancing guidelines) របស់រដ្ឋាភិបាលសហព័ន្ធ នឹងត្រូវពន្យារពេលដល់ថ្ងៃទី៣០ ខែមេសាខាងមុខ ខណៈអត្រាមរណភាពនៅក្នុងប្រទេស ទំនងជានឹងកើនឡើងខ្ពស់បំផុត នៅក្នុងរយៈពេលពីរសប្តាហ៍ទៀត។ ទោះយ៉ាងណាលោក ត្រាំ សង្ឈឹមថា សហរដ្ឋអាមេរិកនឹងវិលត្រឡប់ទៅរកស្ថានភាពធម្មតាវិញ នៅត្រឹមថ្ងៃទី ០១ ខែមិថុនា៕  ប្រភព៖ Fresh News