ទីក្រុង ISTANBUL៖មន្រ្តីនៅតំបន់នោះបាននិយាយថាការរញ្ជួយដីដែលមានកម្លាំង ៥.៧ រិកស្ទ័របានធ្វើឱ្យកក្រើកខេត្ត Bingol នៅភាគខាងកើតប្រទេសទួរគីកាលពីថ្ងៃអាទិត្យ (១៤ មិថុនា) ដោយបានសម្លាប់មនុស្សម្នាក់និងរងរបួស ៩ នាក់ផ្សេងទៀត។

នាយកគ្រប់គ្រងគ្រោះមហន្តរាយនិងគ្រោះអាសន្នរបស់ប្រទេសទួរគី (AFAD) បាននិយាយថាការរញ្ជួយដីជាមួយនឹងចំណុចកណ្តាលរបស់វានៅក្នុងស្រុក Karliova នៃ Bingol បានវាយប្រហារនៅម៉ោង ៥ និង ២៤ នាទី ដែលបំផ្លាញផ្ទះនិងអគាររាប់សិប។

លោកបាននិយាយថា យោធាទួរគីពីរនាក់ នៅក្នុងតំបន់បានរងរបួសនៅពេលអគារបានដួលរលំ ។ ការិយាល័យអភិបាលខេត្ត Bingol បាននិយាយនៅលើធ្វីតធើរថាម្នាក់ក្នុងចំណោមពួកគេនោះក្រោយមកបានស្លាប់បាត់បង់ជីវិត។

ក្រុមមន្ដ្រី AFAD បាននិយាយថាមនុស្ស ៨ នាក់ទៀតបានរងរបួសនៅតាមភូមិនានាក្នុងតំបន់ក្នុងនោះមានក្មេងម្នាក់បានរងរបួសនៅពេលដំបូលផ្ទះដួលរលំ។

ក្រុមមន្ដ្រីបាននិយាយថាតង់ចំនួន ៥៥០ ត្រូវបានបញ្ជូនទៅកាន់តំបន់នេះរួមជាមួយក្រុមជួយសង្គ្រោះបន្ទាន់និងឧទ្ធម្ភាគចក្រសង្គ្រោះបន្ទាន់មួយ។

ប្រទេសទួរគីគឺជាតំបន់ដែល ជារឿយៗទទួលរងនូវការរញ្ជួយដី។ ការរញ្ជួយដីដ៏ធំមួយដែលមានកម្លាំង ៧,៤ រ៉ិចទ័របានសម្លាប់មនុស្សប្រហែល ១៨.០០០ នាក់នៅខែសីហាឆ្នាំ ១៩៩៩ ។

សម្រួលអត្ថបទដោយ៖SOEUR

ប្រភព channelnewsasia