បន្ទាយមានជ័យ ៖ ជនសង្ស័យម្នាក់យកលុយរបស់ថៅកែដែលម្ចាស់សំណង់គេជំពាក់ទូទាត់ឲ្យ ទៅលេងល្បែងនិងស៊ីចាយអស់ជាង៥.០០០ដុល្លារ ត្រូវបានកម្លាំងអាវុធហត្ថឃាត់ខ្លួន។
យោងតាមពាក្យបណ្ដឹងរបស់ឈ្មោះ ស សំរឹត ភេទប្រុស អាយុ៤៥ឆ្នាំ ដែលជាម្ចាស់ហាងលក់គ្រឿងសំណង់ សំរឹត ហេងហេង មានទីតាំងនៅ ភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បានប្ដឹងទៅកងរាជអាវុធហត្ថក្រុងប៉ោយប៉ែត ចោទប្រកាន់ទៅលើឈ្មោះ ម៉ុន ផល្លា ភេទប្រុស អាយុ៣៥ឆ្នាំ ជាបុគ្គលិករបស់ខ្លួន។
តាមការលើកឡើង របស់ ឈ្មោះ ស សំរឹត ជាម្ចាស់ហាងលក់គ្រឿងសំណង់ សំរឹត ហេងហេង បានរៀបរាប់ប្រាប់សមត្ថកិច្ចឲ្យដឹងថា នៅថ្ងៃទី១៤ ខែកញ្ញា ឆ្នាំ២០២៣ ខ្លួនបានឲ្យឈ្មោះ ម៉ុន ផល្លាទៅយកលុយពីអ្នកទិញគ្រឿងសំណង់របស់ខ្លួនហើយធ្វើការជំពាក់ចំនួន៣ទីតាំង ប្រាក់សរុបចំនួន៦.៥៣៤ដុល្លារពេលទារបានហើយ ស្រាប់តែបុគ្គលិកនេះយកលុយទៅលេងល្បែង និងស៊ីចាយអស់មិនយកមកឲ្យខ្លួនទើបខ្លួនដាក់ពាក្យប្តឹងតែម្តង។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឲ្យដឹងថា ក្រោយពីទទួលបានពាក្យបណ្ដឹងពីជនរងគ្រោះ លោកបានដឹកនាំកម្លាំងអាវុធហត្ថ១ក្រុមចុះឃាត់ខ្លួន ឈ្មោះ ម៉ុន ផល្លា បាននៅវេលាម៉ោង៣រសៀល ថ្ងៃទី១៧ ខែកញ្ញា ឆ្នាំ២០២៣ ហើយបានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថក្រុង ហើយកម្លាំងជំនាញបានសួរនាំ ឈ្មោះ ម៉ុន ផល្លា បានរៀបរាប់ថា ខ្លួនពិតជាបានយកប្រាក់ថ្លៃទូទាត់គ្រឿងសំណង់ពីអតិថិជនចំនួន៣ទីតាំង បានប្រាក់សរុបចំនួន ៦.៥៣៤ហើយយកទៅលេងល្បែង និងស៊ីចាយអស់ពិតប្រាកដ។
ជនសង្ស័យក្រោយពីសួរនាំហើយបានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តដើម្បីចាត់ការតាមនីតិវិធីបន្ត។ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវនិងបង្ក្រាបបទល្មើស ដោយទទួលបានបទបញ្ជាពីលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត ជនសង្ស័យឈ្មោះ ម៉ុន ផល្លា ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្ត នៅរសៀលថ្ងៃចន្ទ ទី១៨ ខែកញ្ញា ឆ្នាំ២០២៣នេះហើយដើម្បីដាក់ទោសទៅតាមច្បាប់៕
