លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលយប់ថ្ងៃទី៣ ខែមេសា ឆ្នាំ២០២៤ បានបញ្ជាលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារព្រហ្មទណ្ឌ ដឹកនាំកម្លាំងចុះស្រាវជ្រាវ និងឃាត់បុរសម្នាក់បន្ទាប់ពីបែកធ្លាយវីដេអូពីសកម្មភាពប្រើអំពើហិង្សាលើស្ត្រីម្នាក់ដល់ក្នុងបន្ទប់។ ជាមួយគ្នានេះ លោកស្នងការរាជធានីភ្នំពេញ​ ក៏បានបញ្ជាឲ្យបុរសរូបនោះចូលខ្លួនមកសារភាពកំហុសនៅអធិការដ្ឋាននគរបាលខណ្ឌច្បារអំពៅ ប្ញនៅស្នងការដ្ឋាននគរបាលរាជធានីភ្នំពេញ មុនពេលសមត្ថកិច្ចទៅឃាត់ខ្លួន។

សូមជម្រាបថា កាលពីថ្ងៃទី៣ ខែមេសា ឆ្នាំ២០២៤ មានការបង្ហោះចែកចាយវីដេអូពីសកម្មភាពបុរសម្នាក់ដែលគេស្គាល់ថាឈ្មោះ ដែន សូនី​ បានចូលទៅវាយស្ត្រីម្នាក់ដល់ក្នុងបន្ទប់ ខណៈសាមីខ្លួនទាំងពីរបានចេញមកបញ្ជាក់ថា គ្រាន់តែជាការថតសម្ដែងតែប៉ុណ្ណោះ ហើយរឿងនេះកន្លងហួសយូរហើយដែរ។

មកដល់ពេលនេះ លោក ដែន សូនី ត្រូវបានកម្លាំងនគរបាលនៃស្នងការដ្ឋាននគរបាលរាជធានីភ្នំពេញបញ្ជូនខ្លួនទៅសាលាដំបូងរាជធានីភ្នំពេញ តាមបទបញ្ចារបស់លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរជធានីភ្នំពេញ។ នេះបើតាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញប្រាប់កម្ពុជាថ្មី នៅល្ងាចថ្ងៃទី៤ ខែមេសានេះ។ បើតាមលោកវរសេនីយ៍ឯក សំ វិច្ឆិកា ករណីនេះគឺជាបទល្មើសព្រហ្មទណ្ឌដែលត្រូវឲ្យសមត្ថកិច្ចអនុវត្តវិធានការច្បាប់៕

លោក ផែង វណ្ណៈ ក៏បានសរសររៀបរាប់ថា ធ្លាប់​សំដែង​ហើយ​សុំទោស​រួចខ្លួន​ លេីកនេះ​អត់​រួច​ខ្លួន​ទេ​ មុននេះ​ឯកឧត្ដម​ឧត្ដមសេនីយ៍​ឯក​ ជួន​ ណារិន​ អគ្គ​ស្នងការ​រង​ និង​ជាស្នងការ​នគរបាល​រាជធានី​ភ្នំពេញ​ បានបញ្ជាក់​ប្រាប់​ខ្ញុំ​អោយដឹងថា​ សមត្ថកិច្ច​នគរបាល​ព្រហ្មទណ្ឌ​កម្រិតស្រាល​បាន​ឃាត់ខ្លួន​ឈ្មោះ​ គង់​ សុខសែង​ ហៅ​ ដែន​ សូនី​ ដេីម្បី​កសាង​សំណុំរឿង​បញ្ជូនទៅ​ តុលាការ​ចាត់ការបន្តតាមផ្លូវច្បាប់​ ។

នៅ​ប្ដីប្រពន្ធ​មួយគូរពីរគូរទៀត​ពូកែ​សំដែង​ឈ្លោះគ្នា​តាម​អនឡាញ​ អនាគតបនៅតែសំដែងទៀត​គួរ​ចាប់​បញ្ជូន​ទៅ​តុលាការដែរ​ប្រហែលជាលែងហ៊ានសំដែងឈ្លោះគ្នាទៀតហេីយ​ ។