ក្រោយផ្ទុះការរិះគន់ ក្រសួងពាក់ព័ន្ធ នឹងកោះហៅបុគ្គលដែលតាំងខ្លួនជាព្រះមហេសីព្រះបាទជ័យវរ្ម័នទី ៧ បង្ហាញខ្លួនឆាប់ៗ នេះ

ភ្នំពេញ ៖ លោកស្រី ញ៉ែម មរកត រដ្ឋលេខាធិការ ក្រសួងកិច្ចការនារី បានឲ្យដឹង ថា ក្រសួងពាក់ព័ន្ធ នឹងកោះអញ្ជើញ នារីម្នាក់ ដែលតាំងខ្លួនមហេសី របស់ព្រះបាទជ័យវរ្ម័នទី៧ ចាប់ជាតិ មកសួរនាំក្នុងពេលឆាប់ៗខាងមុខនេះ ក្រោយតាំងជាព្រះមហេសីព្រះបាទជ័យវរ្ម័នទី ៧។

ការលើកឡើងរបស់លោកស្រីនេះ បន្ទាប់ពីមានស្រ្តីម្នាក់ ជារកស៊ីអនឡាញបានលើកឡើងថា ខ្លួនជាមហេសី របស់ព្រះបាទជ័យវរ្ម័នទី៧ ហើយក៏មានការផ្ទុះការវែកញែក និងរិះគន់ផងដែរ ។ បន្ទាប់ពីឃើញវិដេអូស្រ្តីនោះរួចមក លោកស្រី ហ៊ុន ស៊ីណាត ក៏បានចេញវិដេអូឡាយបកស្រាយ និងស្នើក្រសួងពាក់ព័ន្ធពិនិត្យមើលករណីនេះផងដែរ ។

យោងតាមការបង្ហោះរបស់លោកស្រី ញ៉ែម មរកត រដ្ឋលេខាធិការក្រសួងកិច្ចការនារី កាលពីយប់ថ្ងៃទី ០៣ ខែកុម្ភៈ ឆ្នាំ ២០២៥ បានឲ្យដឹងថា ក្រោយ លោកជំទាវ ហ៊ុន ស៊ីណាត លោកឡាយមុននេះ លោកស្រី បានយកសៀវភៅស្រាវជ្រាវពីបដិមាដែលឆ្លាក់នៅអង្គរវត្ត និងប្រវត្តិមហេសីទាំងពីររបស់ព្រះបាទជ័យវរ្ម័នទី ៧ មកមើល។

លោកស្រី ញ៉ែម មរកត បានបន្តថា លោកជំទាវ ស្រែកប្រដៅមិនខុសទេ រកស៊ីកុំចេះតែបែកឆ្វេងតាំងខ្លួនជាបារមីនេះបារមីនោះកាន់ ដើម្បីផលប្រយោជន៍ក្រុមខ្លួន ហើយមកបន្ទាបបន្ថោកកិត្យានុភាពជាតិសាសនា វីរបុរស វីរស្ត្រី ជាដូនតាជំនាន់មុន វាមិនអាចទៅរួចទេ។

លោកស្រីរដ្ឋលេខាធិការក្រសួងកិច្ចការនារី បន្ថែមថា អ្នកដែលតាំងខ្លួនជាមហេសីព្រះអង្គ ត្រៀមខ្លួនទៅ ព្រោះឮថា ក្រសួងពាក់ព័ន្ធ នឹងអញ្ជើញទៅបង្ហាញខ្លួនឆាប់ៗ ហើយ។

គួរបញ្ជាក់ថា ថ្មីៗ នេះ បានផ្ទុះការវែកញែក និងរិះគន់យ៉ាងខ្លាំងទៅលើ ឧកញ៉ាលក់ឡេម្នាក់ ដែលបានបង្ហាញសកម្មភាព និងតាំងខ្លួនឯងជាព្រះនាងជ័យរាជទេវី បោកប្រាស់មហាជន បង្កឲ្យមានការភ័ន្តច្រឡំ និងជារឿងដែលបំពុលសង្គម។

ភ្លាមៗ នោះដែរ គេឃើញ លោកជំទាវចិត្តធម៌ ហ៊ុន ស៊ីណាត បានចេញមុខពន្លះយ៉ាងចាស់ដៃផងដែរទៅលើទង្វើបោកប្រាស់មហាជនដែលតាំងនាមជាអ្នកមានបារមី។

លោកជំទាវ ហ៊ុន ស៊ីណាត បានលើកឡើងថា «នាងឡាយថាអ្នកមិនស្គាល់នាងគឺជាមនុស្សភ្លើ ហើយតាំងខ្លួនជាអ្នកមានបុណ្យចុះមកជួយប្រជារាស្ត្រខ្មែរ ជាការប្រមាថដល់មហាជនយ៉ាងធ្ងន់ធ្ងរ។ កន្លងមក ថ្នាក់ដឹកនាំបានចាត់វិធានការលើអ្នកតាំងខ្លួនជាអ្នកមានបារមីកន្លងមក ដូច្នេះសូមសមត្ថកិច្ចគួរមានវិធានការលើបុគ្គលទាំងនេះផង»៕