យោងតាមការបង្ហោះរបស់ហ្វេសប៊ុកផេកផ្លូវការ ក្រសួងទេសចរណ៍ Ministry of Tourism, Cambodia បានជូនដំណឹងអោយដឹងថា ៖ «ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងលោក GAGAN Malik តារាបូលីវូតដ៏ល្បី (តួសម្តែងជាព្រះពុទ្ធ) បានផ្ញើសារអំពីភាពសម្បូរបែបនៃទេសចរណ៍កម្ពុជា និងបង្ហាញពីកត្តាសុខសន្តិភាព ស្ថានភាពនយោបាយ សន្តិសុខ សណ្តាប់ធ្នាប់សាធារណៈ សង្គមពិតជាក់ស្តែងនៅកម្ពុជា ជាពិសេសអំពីទេសចរដែលកំពុងមកទស្សនាកម្សាន្ត ប្រកបដោយសុខសុវត្ថិភាព ជូនដល់ពិភពលោក»។
សូមជម្រាបឡើងវិញបន្តថា លោក Gagan Malik គឺជាតារាសម្ដែងបូលីវូដដែលមានឈ្មោះបោះសំឡេងមួយរូប លោកមានវ័យ ៤៨ឆ្នាំ លោកកើតនៅថ្ងៃទី២៨ ខែកុម្ភៈ ឆ្នាំ១៩៧៦។ ជាមួយគ្នានេះដែរនៅកាលពីអំឡុងខែមីនា ឆ្នាំ ២០២៤ កន្លងទៅ លោក GAGAN Malik ធ្លាប់បានធ្វើដំណើរមកទឹកដីអង្គរនៃខេត្តសៀមរាប និងបានចូលជួបថ្វាយបង្គំព្រះអង្គគ្រូ ពិន សែម នៅវត្តរាជបូណ៌ព្រមទាំងមានសទ្ធាជ្រះថ្លា បានប្រគេនតេយ្យទាន ក៏ដូចជារូបចម្លាក់ព្រះពុទ្ធអង្គទុកជាអនុស្សាវរីយ៍ផងដែរ៕
