នាយឧត្តមសេនីយ៍ ឈុំ សុជាតិ អ្នកនាំពាក្យ​ក្រសួង​ការពារ​ជាតិ​កម្ពុជា បានបដិសេធ​ថា កាំភ្លើង​ដែល​អាជ្ញាធរ​ថៃ​ចាប់​បាន​ពីជនជាតិ​ថៃ នៅ​ក្នុង​ខេត្តត្រាត គឺ​មិន​ពាក់ព័ន្ធ​ជាមួយ​កម្ពុជា​នោះ​ទេ ហើយ​កម្ពុជា​ក៏មិន​ដែល​ប្រើប្រាស់​កាំភ្លើង​អស់​ទាំង​នោះ​ដែរ។

ការ​បដិសេធនេះ បានធ្វើឡើង​បន្ទាប់​ពីសារព័ត៌មាន​ថៃមួយ​ចំនួន​​បានផ្សាយថា សមត្ថកិច្ចថៃ​នៅ​ប៉ុស្តិ៍ត្រួតពិនិត្យ​​ម៉ៃរូត ស្រុកខ្លងយ៉ៃ ខេត្តត្រាត ជាប់​ព្រំដែន​កម្ពុជា បានចាប់​រថយន្តមួយគ្រឿង​ដែល​ដឹក​អាវុធ​ខុសច្បាប់ កាលពី​ម៉ោង​ជាង ១២រំលង​អធ្រាត ឈាន​ចូល​ថ្ងៃទី១១ ខែមេសា ឆ្នាំ២០១៨ កន្លង​ទៅ។ ដោយសារព័ត៌មានថៃ​ បានផ្សាយ​ទៀតថា អាវុធទាំងនោះ ដឹកចេញ​តាម​ទូក​នេសាទ នៅម្តុំស្ទឹងហាវ ខេត្តព្រះសីហនុ របស់ប្រទេសកម្ពុជា។ ទាក់ទងករណីនេះ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជា បានថ្លែង​ប្រាប់ខ្លីៗ តាមទូរសព្ទ​នៅព្រឹកថ្ងៃទី១៩ ខែមេសា នេះថា “មិនមែនជាកាំភ្លើងរបស់ខ្មែរទេ គឺអត់មានទេ យើងមិនដែលប្រើប្រាស់កាំភ្លើងប្រភេទ​នឹងទេ។ ហើយការចុះផ្សាយអត់មានប្រភព​ច្បាស់លាស់ មិនអាច​ទទួលយក​បានទេ”។ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជា (រូបភាព​ឯកសារ) សូមជម្រាបថា រថយន្តភិកអាប់ (មួយបាំងកន្លះ) មួយគ្រឿង ដែលមានបិទស្ទិកឃឺយោធា មាន​ផ្ទុក​កាំភ្លើង​ខុស​ច្បាប់​ជា​ច្រើន​ដើម ត្រូវបាន​ប៉ូលិស​ថៃ​ស្ទាក់ចាប់បាន​ នៅចំណុចត្រួតពិនិត្យ​មួយ​នៅក្នុង​ខេត្តត្រាត ជាប់ព្រំដែនកម្ពុជា កាលពីយប់ឈានចូលថ្ងៃទី១១ ខែមេសា ឆ្នាំ២០១៨។ លោកវរសេនីយ៍ឯក Singh Naree មេអធិការកិច្ចនៅស្ថានីយប៉ូលិស Mai Rud និងនាយទាហានម៉ារីននៃកងវរសេនាធំទី៥៣២ បានដឹកនាំកម្លាំងល្បាត ហើយបានឆែកឆេរយានយន្តចូល និងចេញ នៅ​ស្រុកខ្លងយ៉ៃ ខេត្តត្រាត។ អំឡុង​ពេលល្បាត អាជ្ញាធរបានសំគាល់ឃើញរថយន្ត Toyota មួយបាំងកន្លះ ពាក់​ស្លាកលេខបាងកក និង​មាន​គម្របជ័រនៅឃ្លុបក្រោយ នា​ម៉ោងប្រមាណ១១យប់។ រថយន្តដែលបើកបរដោយឈ្មោះ ឆាយុទ្ធ ប្រាសឺតរីត អាយុ៥៣ឆ្នាំនោះ ក៏មានបិទស្ទិកឃឺកងពលរថក្រោះទី៤ ជាហេតុកាន់តែនាំ​ឲ្យ​មានការសង្ស័យ។ ក្រោយ​ឆែកឆេរ ប៉ូលិស​ថៃ​បាន​រកឃើញ​សព្វាវុធកំរិតយោធា​ រួមមាន កាំភ្លើងវាយប្រហារ Tavor ពីរដើម កាំភ្លើងវែង M-16 ចំនួន ៤ដើម កំណាត់កាំភ្លើងខាងលើ M-16 ចំនួន២០ដុំ កំណាត់ខាងក្រោមចំនួន ១៦កង់ និងចន្លុះភ្លើងបំភ្លឺចំនួន៣៕ ប្រភព៖ Prom Veatsobon