ភ្នំពេញ៖ កាលពីព្រឹក​ថ្ងៃទី២៤ ខែមេសា ឆ្នាំ២០១៨ នៅ​គល់ស្ពាន​ព្រែក​ព្នៅ ត្រើយ​ខាងលិច ក្នុង​សង្កាត់​ព្រែក​ព្នៅ ខណ្ឌ​ព្រែក​ព្នៅ រាជធានី​ភ្នំពេញ ​រថយន្ត​ស៊ីម៉ងត៍​កំពុងបើក​ឡើង​ស្ពាន ដោយសារតែរថយន្ត​នោះ​មាន​ដឹក ស៊ីម៉ងត៍​ច្រើន ឡើង​មិន​រួច​បាន​រអិល​ថយក្រោយ មក​បុក​ចំហៀង​ខាងឆ្វេង នៃ​រថយន្ត​ដឹក​សាំង មួយ​ចំហៀង រុញ​ទៅ​ប៉ះ​និង​កង់​បី បន្តទៀត​ផ្ទប់​ទៅ​និង​បង្កាន់ដៃស្ពាន រង​ការខូចខាត ស្ទើរ​ទាំងស្រុង។

ប្រភពពីប្រជាពលរដ្ឋ បានប្រាប់ថា រថយន្ត​ដឹក​ស៊ីម៉ងត៍ ពាក់​ស្លាក​លេខ កំពត 3A-0209 នៅ​ពីមុខ និង​មាន​រថយន្ត​ដឹក​សាំង​ពាក់​ស្លាក​លេខ ភ្នំពេញ 3A-9569 និង ម៉ូតូ​កង់​បី ពាក់​ស្លាក​លេខ​ភ្នំពេញ 1FI-0961 បើកបរ​បន្តកន្ទុយ​គ្នា ពី​លិចទៅ​កើត ក្នុងទិសដៅ ស្រប​ទិស​គ្នា។ ក្រោយពីកើតហេតុ ភ្លាមនោះ​អ្នកបើកបរ​រថយន្ត​ដឹក​ស៊ីម៉ងត៍ បាន​រត់​គេចខ្លួនបាត់។ បច្ចុប្បន្នសមត្ថកិច្ច បានមកធ្វើការវាស់វែង និង សម្រួលចរាចរណ៍កុំឲ្យមានការកកស្ទះចរាចរណ៍៕ ប្រភព៖ ហេងលី