ភ្នំពេញ ៖ បុរសម្នាក់ក្នុងចំណោមបក្ខពួកពីរនាក់ ត្រូវម្ចាស់រថយន្ដចាប់ប្រគល់អោយសមត្ថកិច្ច ចំណែកម្នាក់ម្នាក់ទៀតជិះម៉ូតូគេចខ្លួនបាត់ ក្រោយពីធ្វើសកម្មភាពជិះម៉ូតូដេញគប់កញ្ចក់រថយន្ដព្រោះតែខឹងម្ចាស់រថយន្ដបើកជាន់ហ្គែររោទ៍ខ្លាំង។

ហេតុការណ៍នេះបានកើតឡើងនៅវេលាម៉ោង២៣និង៣០ ថ្ងៃទី២៧ ខែមេសា ឆ្នាំ២០១៨ នៅតាមបណ្ដោយផ្លូវលេខ១៥៦ ក្នុងសង្កាត់ទឹកល្អកទី៣ ខណ្ឌទួលគោក រាជធានីភ្នំពេញ។ សមត្ថកិច្ចបានអោយដឹងថា ជនសង្ស័យដែលឃាត់ខ្លួនមានឈ្មោះ ភារុណ ភេទប្រុស អាយុ២៥ឆ្នាំ ស្នាក់នៅម្ដុំរង្វង់មូលទួលគោកចាស់។ បើតាមការរៀបរាប់ពីម្ចាស់រថយន្ដបានអោយដឹងថា មុនពេលកើតហេតុគឺរូបបើករថយន្ដហាយសេរីឆ្នាំ២០១២ ពណ៍កាំមៃ ដែលទើបតែទិញមកពីស្រុកក្រៅបំណងទៅឃ្លាំងរថយន្ដក្នុងមជ្ឈមណ្ឌល់ម៉ុងឌីយ៉ាល់ តែពេលមកដល់ចំណុចកើតហេតុក៏ក្រុមជនបង្កឈរនៅលើដងផ្លូវក៏ជាន់រោទ៍បន្តិចរួចក៏បើកផុតទៅ។ ប្រភពដដែលបានបន្តថា ពេលបើកមកដល់ជិតសាលាបឋមសិក្សាទឹកល្អក៣ស្តាប់តែជនបង្កជិះឌុបគ្នាដេញតាមគប់រថយន្ដគាត់តែមិនបែក ហើយគាត់បើករថយន្ដបន្តរហូតដល់មជ្ឈមណ្ឌល់ម៉ុងឌីយ៉ាល់ដោយមានការសង្ស័យក៏ឈប់រថយន្ដរួចចុះពីរថយន្ដចាំលួចមើលស្រាប់ឃើញជនបង្កជិះម៉ូតូមកឈប់និងចុះពីម៉ូតូគប់រថយន្ដគាត់ថែមទៀតហើយក៏ស្រែកអោយគេជួយចាប់បានតែម្ដង។ ចំណែកជនសង្ស័យបានអោយដឹងថា ដោយសារតែឃើញរថយន្ដបើកជាន់ហ្គែររោទ៍ខ្លាំងទើបមានចិត្តហើយក៏ជិះម៉ូតូដេញគប់តែម្ដង។ ក្រោយពីសួរនាំនិងសម្របសម្រួលគ្នានៅប៉ុស្ដិ៍នគរបាលរដ្ឋបាលទឹកល្អទី៣ភាគីខាងម្ចាស់រថយន្ដព្រមយកសំណងចំនួន១៨០ដូល្លារពីជនបង្កដើម្បីបញ្ចប់រឿងរួចក៏ចែកផ្លូវគ្នារៀងៗខ្លួន៕