ក្រោយសម្រែកសាច់ញាតិស្រែកយំ និងស្នូរភ្លេងក្លងខែក! រឿងពុលនៅក្រចេះ យកឈាមអ្នកស្លាប់ទៅពិនិត្យដល់សិង្ហបុរី ឯលទ្ធផលផ្ទុយស្រលះពីការគិតទាំងស្រុងតែម្តង...

ករណីពុលទឹកស្លាប់មនុស្ស ១៣នាក់ និងចូលមន្ទីរពេទ្យជាង ២០០នាក់នៅខេត្តក្រចេះ បានធ្វើឲ្យមានការស្រាវជ្រាវយ៉ាងសស្រាក់សស្រាំ ពីក្រសួងពាក់ព័ន្ធនានា ដើម្បីស្វែងរកមូលហេតុពិត ប៉ុន្តែលទ្ធផលដែលទទួលបានគឺខុសគ្នាទាំងស្រុង។ នៅថ្ងៃទី២១ ខែឧសភានេះ ឯកឧត្ដម ស៊ុយ សែម រដ្ឋមន្ត្រីក្រសួងរ៉ែ និងថាមពលបានបញ្ជាក់ថា ការពុលទឹកនៅខេត្តក្រចេះថ្ងៃមុន ក្រសួងបរិស្ថាន បានយកឈាមអ្នកស្លាប់ទៅពិនិត្យដល់ប្រទេសសិង្ហបុរី ហើយរកឃើញថា គ្មានជាតិស្យានីដដែលប្រើសម្រាប់លាងសម្អាតរ៉ែមាស នៅក្នុងឈាមអ្នកស្លាប់នោះទេ ពោលគឺនៅក្នុងទឹក មានជាតិពុលពីថ្នាំសម្លាប់សត្វល្អិត និងថ្នាំសម្លាប់ស្មៅ។

ឯកឧត្ដម ស៊ុយ សែម បានអះអាងថា ក្រសួងរ៉ែ និងថាមពល រួមជាមួយក្រសួងពាក់ព័ន្ធនានា បានធ្វើការស្រាវជ្រាវយ៉ាងលម្អិត ទៅលើមូលហេតុដែលនាំមានអ្នកពុលទឹកស្លាប់ជាច្រើននាក់ នៅខេត្តក្រចេះកាលពីពេលថ្មីៗនេះ។ ជាមួយគ្នានោះដែរ ក្រសួងបរិស្ថាន បាននាំយកឈាមអ្នកស្លាប់ទៅពិនិត្យដល់ប្រទេសសិង្ហបុរី ហើយលទ្ធផលបង្ហាញថា គ្មានជាតិស្យានីដ (សារធាតុគីមី សម្រាប់លាងសម្អាតមាស) នៅក្នុងឈាមរបស់អ្នកស្លាប់នោះទេ។

រដ្ឋមន្ត្រីក្រសួងរ៉ែ និងថាមពលរូបនេះ បានបញ្ជាក់ទៀតថា ជាតិពុលដែលបណ្ដាលឲ្យមានមនុស្សស្លាប់ក្រោយផឹកទឹកព្រែកទេរនោះ គឺថ្នាំសម្លាប់សត្វល្អិត និងថ្នាំសម្លាប់ស្មៅនៅក្បែរព្រែក ដូចដែលក្រសួងសុខាភិបាលបានបញ្ជាក់តាំងពីដំបូង។ លោកបានសង្កត់ធ្ងន់ថា ខាងមន្ត្រីជំនាញរបស់ក្រសួងរ៉ែ និងថាមពល ក៏បានចុះទៅថតដែរ គឺឃើញថា មានធុងថ្នាំកម្ចាត់ស្មៅ និងសត្វល្អិតរាប់រយធុង នៅមាត់ស្ទឹង មាត់ព្រែក។ ចំណែករឿងពុលស្រាវិញ គឺដូចក្រសួងសុខាភិបាលបានប្រកាស ដោយសារមានជាតិមេតាណុលខ្ពស់ហួសកម្រិត។

ជាមួយគ្នានេះដែរ ឯកឧត្តម ស៊ុយ សែម បានមានប្រសាសន៍ថា ក្រសួងរ៉ែ និងថាមពល បានបំពេញភារកិច្ចយ៉ាងសស្រាក់សស្រាំ ដើម្បីរកមូលហេតុបង្ហាញជូនប្រជាពលរដ្ឋ។ បើតាមអ្នកនាំពាក្យក្រសួងបរិស្ថាន លោក សៅ សុភាព បាននិយាយថា ក្រសួងកំពុងរៀបចំចងក្រងរបាយការណ៍លម្អិត ស្ដីពីលទ្ធផលនៃការធ្វើពិសោធន៍លើសំណាក ដែលប្រមូលបាន។ លទ្ធផលនៃពិសោធន៍ ដែលធ្វើដល់ប្រទេសសិង្ហបុរី នឹងផ្សព្វផ្សាយក្រោយពេលចងក្រងរួចរាល់។

ទោះបែបនេះក្ដី គេឃើញថា ការលើកឡើងរបស់រដ្ឋមន្ត្រីក្រសួងរ៉ែ និងថាមពល ខុសគ្នាទាំងស្រុង ទៅនឹងការលើកឡើងរបស់រដ្ឋមន្ត្រី ក្រសួងឧស្សាហកម្ម និងសិប្បកម្ម។ កាលពីថ្ងៃទី១៧ ខែឧសភាកន្លងទៅ ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងថា ក្រសួងបានបញ្ជូនសំណាកដែលរកឃើញថ្មីៗទៅសម្ដេចតេជោ ហ៊ុន សែន ដើម្បីត្រួតពិនិត្យ មុនចាត់វិធានការណ៍តាមផ្លូវច្បាប់ ទៅលើអាជីវកម្មរ៉ែមាស ដែលមានទីតាំងនៅក្នុងខេត្តក្រចេះ។

ការថ្លែងបែបនេះ គឺបន្ទាក្រោយពេលផ្ទុះហេតុការណ៍ពុលទឹក ក្រុមមន្ត្រីជំនាញបានចុះធ្វើការតាមដានយ៉ាងយកចិត្តទុកដាក់ ហើយក្រសួងបានរកឃើញថា ក្រុមអ្នកជីករ៉ែមាស ដែលកំពុងធ្វើអាជីវកម្មតាមដងព្រែកនោះ បានប្រើប្រាស់សារធាតុគីមី សម្រាប់លាងសម្អាតមាស ដែលមានភាពពុលខ្លាំង ហើយពេលប្រជាពលរដ្ឋប្រើប្រាស់ ក៏បណ្ដាលឲ្យពុលពេញភូមិរហូតដល់ស្លាប់ និងចូលមន្ទីរពេទ្យតែម្ដង។

គួរបញ្ជាក់ថា នៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ បានជួបរឿងទុក្ខសោកមួយ គឺប្រជាជនពុលស្រា និងពុលទឹក បណ្ដាលឲ្យស្លាប់បន្តបន្ទាប់រហូតដល់ទៅ១៣នាក់ និងចូលសម្រាកនៅមន្ទីរពេទ្យប្រមាណជាង ២០០នាក់ផ្សេងទៀត។ នៅក្នុងភូមិទាំង២ លឺតែសម្រែកសាច់ញាតិស្រែកយំ និងស្នូរភ្លេងក្លងខែក។ ក្រោយកើតរឿងហេតុចម្លែកនេះ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានចាត់មន្ត្រីជំនាញថ្នាក់ក្រសួង និងថ្នាក់ខេត្ត ដោយប្រើប្រាស់មន្ទីរពិសោធន៍ចល័ត ក្រសួងឧស្សាហកម្ម និងសិប្បកម្ម ចុះពិនិត្យនិងស្រាវជ្រាវផ្ទាល់នៅកន្លងកើតហេតុ ដើម្បីរកមូលហេតុដែលបណ្តាលឲ្យមានមនុស្សស្លាប់ និងកំពុងសង្គ្រោះបន្ទាន់ ដោយបានប្រមូលយកសំណាកគំរូ ស្រាស និងទឹកក្នុងព្រែកទេរ នៅកន្លែងកើតហេតុ មកពិនិត្យនៅនឹងកន្លែង និងនៅមន្ទីពិសោធន៍ក្រសួងឧស្សាហកម្ម និងសិប្បកម្ម។

ក្រោយមកក្រសួងឧស្សាហកម្ម និងសិប្បកម្ម បានបង្ហាញពីលទ្ធផលពិសោធន៍ ដោយរកឃើញសារធាតុគីមីក្នុងស្រាស និងទឹកព្រែកទេ នៅខេត្តក្រចេះ ដែលជាហេតុផលនាំឲ្យមានអ្នកស្លាប់ និងរងគ្រោះរាប់សិបនាក់។ នេះបើយោងតាមលោក ចាន់ បូរិន្ទ ប្រធានវិទ្យាស្ថានស្តង់ដាកម្ពុជា នៃក្រសួងឧស្សាហកម្ម និងសិប្បកម្ម បានប្រាប់បណ្តាញព័ត៌មាន Fresh News កាលពីរសៀលថ្ងៃទី៧ ខែឧសភា ឆ្នាំ២០១៨។

គំរូសំណាកស្រាស៖ មានសារធាតុមេតាណុល១១,២២% (ដែលកម្រិតស្តង់ដា អនុញ្ញាតឲ្យមានខ្ពស់បំផុតត្រឹមតែ០,១៥%ប៉ុណ្ណោះ)។ ចំណែកគំរូសំណាក ទឹកព្រែកទេ៖ មានសារធាតុក្រូម (Chromium) រហូតដល់១៧៣ មីក្រូក្រាមក្នុងទឹកមួយលីត្រ (ដែលកម្រិតស្តង់ដា អនុញ្ញាតឲ្យមានខ្ពស់បំផុតត្រឹមតែ៥០មីក្រូក្រាមក្នុងទឹកមួយលីត្រ) និងមានសារធាតុនីទ្រីតរហូតដល់ ៧-២៣ មីលីក្រាមក្នុងទឹកមួយលីត្រ (ដែលកម្រិតស្តង់ដា អនុញ្ញាតឲ្យមានខ្ពស់បំផុតត្រឹមតែ ៣ មីលីក្រាមក្នុងទឹកមួយលីត្រ)។

បើតាមឯកសារ Elements de Toxicologie Analytique សម្រាប់មនុស្សពេញវ័យ ប្រសិនបើពិសាមេតាណុលសុទ្ធ ក្នុងបរិមាណពី ២០ ទៅ៥០មីលីលីត្រ អាចបណ្តាលឲ្យជនរងគ្រោះស្លាប់បាន។ ដូចនេះបើគាត់ពិសាស្រាពុលខាងលើ ក្នុងបរិមាណចាប់ពី១៨០មីលីលីត្រ ឡើងទៅអាចបណ្តាលឲ្យគាត់ស្លាប់បាន។ ចំពោះផលប៉ះពាល់សុខភាព ដោយសារធាតុក្រូម (Chromium)៖ កន្ទួលស្បែក ក្រពះ និងដំបៅរលាក បញ្ហាផ្លូវដង្ហើម ប្រព័ន្ធភាពស៊ាំចុះខ្សោយ ការខូចតម្រងនោមនិងថ្លើម ការផ្លាស់ប្តូរសម្ភារហ្សែន មហារីកសួត និងអាចបណ្តាលឲ្យស្លាប់។ ចំណែកផលប៉ះពាល់សុខភាពដោយសារធាតុ នីទ្រីត (NO2)៖ ជំងឺមហារីកក្រពះ ជំងឺរាគរូស ក្អួត និងអាចបណ្តាលឲ្យស្លាប់៕