ខេត្ត​ព្រះសីហនុ៖ មួយរយៈក្នុងរដូវភ្លៀងដើមឆ្នាំនេះ មានករីណីរន្ទះបាញ់ជាច្រើនករណី បណ្ដាលឱ្យមនុស្សស្លាប់ និងរបួសជាច្រើននាក់ ក្នុងក៏មានសត្វពាហនៈងាប់ជាច្រើនក្បាលផងដែរ ។

ជាក់ស្ដែងកាលពីវេលាម៉ោង​១២ថ្ងៃ​ត្រង់​ថ្ងៃ​ចន្ទ​ទី​២១​ ខែឧសភា​ ឆ្នាំ​២០១៨ ម្សិលមិញនេះ មានករណីរន្ទះបាញ់លើកម្មកររបស់ឯកឧត្ដមបណ្ឌិត ម៉ុង ឬទ្ធី បណ្ដាលឱ្យសន្លប់មនុស្សប្រុសស្រី ២នាក់ ត្រូវជាប្ដីប្រព្ធ និងស្លាប់ក្មេងប្រុសម្នាក់ ត្រូវជាកូនរបស់២នាក់ប្ដីប្រពន្ធខាងលើ ដែលករណីនេះបានកើតឡើងនៅចំការកៅស៊ូរបស់ឯកឧត្ដមបណ្ឌិត ម៉ុង ឫទ្ធី ម្តុំ​ភូមិ​ឫទ្ធី​៤​ ឃុំកែវផុស​ ស្រុក​ស្ទឹងហាវ​ ខេត្ត​ព្រះសីហនុ​ ដែល​មាន​ចម្ងាយ​ប្រមាណ​ជា​១៩០គីឡូម៉ែត្រ​ពី​ភ្នំពេញ ។ យោងតាមព័ត៌មានពីទំព័រហ្វេសប៊ុកផ្លូវការរបស់ ឯកឧត្ដមបណ្ឌិត ម៉ុង ឫទ្ធី បានឱ្យដឹងថា ជនរងគ្រោះទី១ឈ្មោះ ហ៊ន​ វ៉ាន ភេទប្រុស ទី ២ឈ្មោះ មុំ ភេទស្រី សន្លប់បាត់ស្មារតីទាំង២នាក់ ត្រូវបានសង្គ្រោះទាន់ពេល និងទី៣ឈ្មោះ ជុំ​ វីន អាយុ ​៥ឆ្នាំ ស្លាប់ខណៈដែលយកទៅសង្គ្រោះនៅ គ្លីនិក​ម៉ុង​ ឫទ្ធី​ឃុំកែវផុស ។ ក្រោយកើតហេតុ សពកុមាររងគ្រោះត្រូវបានបញ្ជូនទៅធ្វើបុណ្យតាមប្រពៃណី ដោយឯកឧត្ដមបណ្ឌិត ម៉ុង ឫទ្ធី និងលោកជំទាវ ជាអ្នករ៉ាប់រងរាល់ការចំណាយទាំងស្រុងទៅលើការព្យាបាល និងធ្វើបុណ្យ ។ ជាចុងក្រោយ ឯកឧត្ដមបណ្ឌិត ម៉ុង ឫទ្ធី បានបញ្ជាក់ថា នេះជាលើកទី១ហើយ​ដែល​កម្មករ​ចំកាកៅស៊ូ​តំបន់​ឆ្នេរ​សមុទ្រ​កែវផុស​ទទួល​រងគ្រោះ​ដោយ​រន្ទះ​បាញ់ ៕ ប្រភព៖ ឯកឧត្ដមបណ្ឌិត ម៉ុង ឫទ្ធី