ខេត្តក្រចេះ ​៖ កាលពីថ្ងៃទី២២ ខែឧសភា ឆ្នាំ២០១៨ សមត្ថកិច្ចបានធ្វើការឃាត់ខ្លួនជនសង្ស័យម្នាក់​ ដែលបានយកពូថៅមកវាយសំពងជីតារបស់ខ្លួនរហូតមានរបួសធ្ងន់នោះ ហើយក៏បានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យ ដែលហេតុការណ៍នេះបានកើតឡើងនៅចំណុច ភូមិ ក្រគរ ​សង្កាត់​ក្រគរ ក្រុង​ក្រចេះ​ ។ ​

ជនសង្ស័យមានឈ្មោះ លី​ម ណា​រ៉ុ​ង អាយុ​៣៣​ឆ្នាំ រស់នៅ​ជាមួយ​​​ជីតា ​​​ក្នុងភូមិ ក្រគរ ​សង្កាត់​ក្រគរ ក្រុង​ក្រចេះ​ ។ ​ ចំណែកជនរងគ្រោះមានឈ្មោះ ធូ ឈីម អាយុ ៦៨ឆ្នាំ រស់នៅជាមួយគ្នា។ តាមការឲ្យដឹងពីជនសង្ស័យបានប្រាប់ថា ខ្លួនបានគក់ខោអាវ រួចបានចងស្នួលហាលខោអាវកាត់ពីមុខផ្ទះ ក្រោយមកជីតាក៏បានស្តីបន្ទោសឲ្យខ្លួនថា កុំហាលមុខផ្ទះមិនសមទេ ស្រាប់តែខឹងបានរត់ទៅយកពូថៅវាយចំក្បាលជីតា បណ្តាលឲ្យរងរបួស ហើយក៏បានស្លាប់ក្រោយពេលបញ្ជូនទៅដល់មន្ទីរពេទ្យតែម្តង។ បច្ចុប្បន្នជនសង្ស័យ ត្រូវបានសមត្ថកិច្ចចាប់វាយខ្នោះ និងបញ្ជូនទៅអធិការដ្ឋាន រង់ចាំធ្វើការផ្តន្ទាទោសតាមច្បាប់៕ ដោយៈ និស្ស័យ