ភ្នំពេញ ៖ រថយន្តព្រូសមួយគ្រឿង បានធ្វើដំណើរតាមដងផ្លូវ ហើយចាប់ហ្វ្រាំងបង្ខំឈប់ ដោយខ្លាចទាក់ខ្សែភ្លើង​ដាច់ធ្លាក់កាត់ទទឹងផ្លូវ ក៏ត្រូវរថយន្តហាយឡែនឌ័របុកពីក្រោយ បណ្ដាលឲ្យរងការខូចខាតទាំងពីរគ្រឿង តែសំណាងល្អមិនបង្កឲ្យមនុស្សរងរបួសនោះទេ ។

ក្នុងករណីគ្រោះថ្នាក់ចរាចរណ៍ខាងលើនេះ បានបង្កឡើងនៅវេលាម៉ោង១១ និង៤០នាទីយប់ ថ្ងៃទី២៤ ខែឧសភា ឆ្នាំ២០១៨ នៅតាមបណ្ដោយផ្លូវព្រះមុន្នីរ៉េត(២១៧) ក្បែរផ្សារស្ទឹងមានជ័យចាស់ ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។ បើតាមប្រភពព័ត៌មានពីកន្លែងកើតហេតុ បានឲ្យដឹងថា ដំបូងគេសង្កេតឃើញ មានរថយន្តកុងតឺន័រ ធុនធំ មិនចាំស្លាកលេខ បើកបរកាត់កន្លែងកើតហេតុ និងបានទាក់ខ្សែរកាបដែលតភ្ជាប់ទទឹងផ្លូវ បណ្ដាលឲ្យដាច់ធ្លាក់រាយប៉ាយពេញផ្លូវ ហើយរថយន្តកុងតឺន័រខាងលើមិនឈប់នោះទេ ដោយបានបើកគេចខ្លួនបាត់ស្រមោល ។ មួយសន្ទុះក្រោយមក ស្រាប់តែមានរថយន្តម៉ាក តូយ៉ូតា ព្រូស ពណ៌ស ពាក់ស្លាកលេខភ្នំពេញ 2AB-4375 បានធ្វើដំណើរតាមក្រោយទីតាំងខាងលើ និងអក់ស័រខ្សែភ្លើងនៅកណ្ដាលផ្លូវ ក៏ចាប់ហ្រាំងបង្ខំ ពេលនោះស្របពេលមានរថយន្តមួយគ្រឿងទៀតម៉ាក ហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2X-0467 បានបើកមកពីក្រោយមិនប្រយ័ត្ន ក៏ជ្រុលបុុករថយន្តព្រូសពីក្រោយ បណ្ដាលឲ្យរងការខូចខាតរថយន្តទាំងពីគ្រឿង តែមិនបង្កឲ្យមនុស្សរងរបួសនោះទេ ។ ក្រោយមក សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានឲ្យភាគីរថយន្តទាំងពីរគ្រឿង សម្របសម្រួលគ្នា តែភាគីទាំងពីរកិតតែនិយាយយកតែត្រូវរៀងៗខ្លួន ទើបសមត្ថកិច្ចមូលដ្ឋានទាក់ទងទៅជំនាញចរាចរណ៍ឲ្យចុះមកធ្វើការវាស់វែង យករថយន្តទាំងពីរគ្រឿងទៅរក្សាទុកនៅអធិការដ្ឋាននគរបាលខណ្ឌមានជ័យដើម្បីរង់ចាំដោះស្រាយតាមក្រោយ៕ ដោយ៖ ភារ៉ា