ភ្នំ​ពេ​ញ៖ កាលពីថ្ងៃទី​២១​ ខែឧសភា ឆ្នាំ២០១៨ បងប្អូនបង្កើត​ពីរ​នាក់​អាយុក្រោម​ ១០ ​ឆ្នាំ​ បាន​រត់​ចេញពី​ភូមិគ្រឹះ​ឯកឧត្ដម ​កាន់ ម៉ន អ​តី​ត​មន្ត្រីជាន់ខ្ពស់​គណបក្ស​ ហ៊្វុនស៊ិនប៉ិច​ កាលពី​វេលា​ម៉ោង ​១២ ថ្ងៃត្រង់​ នេះបើតាមការឲ្យដឹងពីអាជ្ញាធរ​ ដែលហេតុការណ៍នេះបានកើតឡើងមាន​ទីតាំងនៅភូមិ​កោះនរា សង្កាត់​និរោធ ខណ្ឌ​ច្បារអំពៅ​ រាជធានី​ភ្នំពេញ ដែលបានរត់គេចពីការធ្វើទារុណកម្ម​ពី​ម្ចាស់​ភូមិគ្រឹះ​នេះ​។

បើតាមការឲ្យដឹងពីក្មេងប្រុសទាំងពីរនាក់នោះបានរៀបរាប់ទាំងអារម្មណ៍​ភ័យខ្លាចថា ក្មេងប្រុសច្បង​ឈ្មោះ ​វី​ ហើយ​ប្អូន​ឈ្មោះ​ វង្ស​ និង​ម្តាយ​ឪពុក​ពួកគេនៅឯ​ខេត្តតាកែវ​។​ នៅ​ចំពោះ​មុខអាជ្ញាធរ​ក្មេងប្រុស​ទាំងពីរ​បាន​និយាយថា ​ពួកគេត្រូវបាន​ម្ចាស់​ភូមិគ្រឹះ​វាយ​ធ្វើបាប​រាល់ថ្ងៃ ​ធ្វើ​ឲ្យ​ពួកគេ​ទ្រាំ​មិនបាន​ក៏​នាំគ្នា​រត់ចេញ​ពី​ភូមិគ្រឹះនេះតែម្ដង​។​ បន្ទាប់ពី​ត្រូវបាន​បញ្ជូន​មកកាន់​ស្នាក់ការ​សង្កាត់​និរោធ​រួចមក លោក​ ចេង មុនី​រ៉ា អភិបាល​នៃ​គណៈ​អភិបាលខណ្ឌ​ច្បារអំពៅ ​បាន​ឲ្យ​ការិយាល័យ​សង្គមកិច្ច​ខណ្ឌ​ចុះទៅ​សហការ​​ជាមួយ​មន្ទីរសង្គមកិច្ច​ នាំ​យក​ក្មេងប្រុស​ទាំងពីរ​ទៅ​រក្សា​ទុកសិន​។​ ដោយឡែក​ម្ចាស់​ភូមិគ្រឹះ​ ត្រូវបានអាជ្ញាធរ​ និង​សមត្ថកិច្ច​កំពុង​ពិនិត្យ​ធ្វើការ​ស្រាវជ្រាវ ​និង​អនុវត្តន៍​តាម​នីតិ​វិធី​ច្បាប់ ​ហើយម្ចាស់​ភូមិគ្រឹះ​នេះ​ធ្លាប់​បានធ្វើ​ទារុណកម្ម​មកលើ​កុមារ​តូចៗ​ កាលពី​ប៉ុន្មាន​ឆ្នាំមុន​ម្តងរួចមកហើយ​៕ ​ ដោយ៖ ចាន់ ​