រាជធានីភ្នំពេញ ៖ កាលពីវេលាម៉ោង៩និង៣០នាទីព្រឹក ថ្ងៃទី ២៦ ខែឧសភា ឆ្នាំ២០១៨ មានរថរយន្តស៊េរីទំនើបមួយគ្រឿងម៉ាក ហាយឡែនឌ័រ ត្រូវបានម្ចាស់រថយន្តយកចតនៅខាងមុខបង្គោលភ្លើង ពេលថយក្រោយរៀបនិងចេញ ក៏ជាប់ហ្គាបោលទីបុកបង្គោលភ្លើង បណ្តាលឲ្យរងការខូចខាតយ៉ាងដំណំ នៅចំណុចបណ្តោយផ្លូវលេខ៣១០ ក្នុងសង្កាត់ទួលស្វាយព្រៃទី១ ខណ្ឌចំការមន ។

សមត្ថកិច្ចបានឲ្យដឹងថា មុនពេលកើតហេតុបុរសម្នាក់បានបើករថយន្តម៉ាកហាយឡែនឌ័រ ពណ៌ស ពាក់ស្លាកលេខ ភ្នំពេញ ២AW-១៦៨៦ របស់ខ្លួនមកចតទុកចោលនៅលើចិញ្ចើមផ្លូវក្បែរបង្គោលភ្លើងមួយដើមខាងលើនោះ ។ លុះមួយសន្ទុះក្រោយមកបុរសម្នាក់ខាងលើក៏បានមកបញ្ឆេះរថយន្តរបស់ខ្លួនក្នុងបំណងបើកចេញទៅវិញ ដោយបានបើកថយក្រោយ​ទៅមុខចុះឡើងៗ ក៏ស្រាប់តែជ្រុលទៅបុកបង្គោលភ្លើងថ្មមួយដើម ក្រពិតផ្នែកខាងមុខរងការខូចខាតយ៉ាងដំណំតែម្តង។ ក្រោយពេលកើតហេតុ បុរសដែលជាម្ចាស់រថយន្ត យករថយន្តទៅជួសជុលដោយខ្លួនឯង។ ចំណែកបង្គោលភ្លើង មិនត្រូវបានរងខូចខាតនោះទេ។ ដោយ៖ និស្ស័យ