ភ្នំពេញ ៖ រថយន្ត CRV មួយគ្រឿង បើក​ក្នុង​ល្បឿន​លឿន​ជ្រុល​ទៅបុក​ចំ​គូទ​រថយន្ត Lexus ធ្វើ​ឲ្យ​រថយន្ត Lexus ជ្រុល​ចង្កូត​ទៅបុក​ជញ្ជាំង​ហាង ហ្វេ​ប្យ៊ូ​ឡឺស – Fabulous បន្តទៀត បណ្ដាល​ឲ្យ​រង​ការខូចខាត​យ៉ាងដំណំ កាលពី​វេលា​ម៉ោង២រំលងអធ្រាត្រ ឈាន​ថ្ងៃទី២ ខែមិថុនា ឆ្នាំ២០១៨នេះ ត្រង់ចំណុច​ហាង ហ្វេ​ប៊ូ​ឡឺស នៅតាម​បណ្តោយ​ផ្លូវ៣១០ កែង​ផ្លូវ៦៣ ស្ថិតក្នុង​សង្កាត់​បឹង​កេងកង​ទី១ ខណ្ឌចំការមន រាជធានី​ភ្នំពេញ។

សមត្ថកិច្ចបានប្រាប់ឲ្យដឹងថា នៅ​មុនពេល​កើតហេតុ គេ​ឃើញ​រថយន្ត​ម៉ាក CRV មួយគ្រឿង ពណ៌​ទឹកប៊ិច មិន​ចាំ​ស្លាក​លេខ បើកបរ​ដោយ​ជនជាតិ​បរទេស២នាក់ ធ្វើដំណើរ​តាម​បណ្តោយ​ផ្លូវ៦៣ ទិសដៅ​ពី​ត្បូង​ទៅ​ជើង។ លុះ​មកដល់​ផ្លូវបែក​ជា​បួន កែង​ផ្លូវ៣១០ ដោយ​មិន​បង្អន់ល្បឿន ស្រាប់​តែមាន​រថយន្ត​ម៉ាក Lexus RX-300 ពណ៌​ទឹកមាស ពាក់​ស្លាក​លេខ ភ្នំពេញ 2H-8103 ធ្វើដំណើរ​តាម​បណ្តោយ​ផ្លូវ៣១០ ទិសដៅ​ពី​កើ​តទៅ​លិច​ក្នុង​ល្បឿន​លឿន​ដូចគ្នា ក៏ត្រូវ​បាន​រថយន្ត CRV បុក​ចំ​គូទ​រថយន្ត Lexus ពេញទំហឹង ហើយ​រថយន្ត Lexus ក៏​រ៉េ​ចង្កូត​ទៅបុក​ចូល​ហាង ហ្វេ​ប្យ៊ូ​ឡឺស – Fabulous បណ្តាល​ឲ្យ​បែក​កញ្ចក់ និង​ជញ្ជឹង រង​ការខូចខាត​យ៉ាងច្រើន។ រីឯ​រថយន្ត​វិញ រង​ការខូចខាត​ផ្នែក​ខាងមុខ​ស្ទើរតែ​ទាំងស្រុង ហើយ​ផ្ទុះ​ពោង​សុវត្ថិភាព​ទាំងសងខាង ខណៈ​រថយន្ត CRV ដែលជា​រថយន្ត​បង្ក​បាន​បន្ថែម​ល្បឿន បើក​រត់​គេចខ្លួនបាត់​ស្រមោល ៕ ប្រភព៖ហេងលី