ស្ថានទូតអាមេរិក បាននិយាយថា ថ្មយកមកពីឋានព្រះច័ន្ទ នឹងត្រូវដាក់បង្ហាញនៅសារមន្ទីរជាតិកម្ពុជា នៅថ្ងៃចន្ទ ទី១៨ ខែមិថុនានេះ

ស្ថានទូតអាមេរិកប្រចាំនៅទីក្រុងភ្នំពេញបានឲ្យដឹងថា សំណាកថ្មដែលត្រូវយកមកពីឋានព្រះច័ន្ទ នឹងត្រូវដាក់បង្ហាញនៅសារមន្ទីរជាតិកម្ពុជា នៅថ្ងៃចន្ទ ទី១៨ ខែមិថុនា ឆ្នាំ២០១៨ខាងមុខចាប់ពីវេលាម៉ោង១០ព្រឹកតទៅ។

យោងតាមសេចក្តីប្រកាសរបស់ស្ថានទូតឲ្យដឹងថា ថ្មឋានព្រះច័ន្ទត្រូវបានផ្តល់ឲ្យប្រទេសកម្ពុជា នៅឆ្នាំ ១៩៧៣ ហើយស្ថិតនៅក្នុងចំណោមសំណាកថ្មព្រះច័ន្ទ “សុឆន្ទៈ” ដែលត្រូវបាននាំយកមក ជាផ្នែកមួយនៃបេសកកម្មរបស់អាប៉ូឡូលេខ ១៧ កាលពីខែធ្នូ ឆ្នាំ១៩៧២។ ហើយការដាក់តាំងថ្មឋានព្រះច័ន្ទនេះ គឺជាផ្នែកមួយនៃខួបលើកទី១០០ ដែលនឹងមកដល់នៅពេលខាងមុខនេះ នៅសារមន្ទីរជាតិកម្ពុជា ហើយសារមន្ទីរនឹងបង្ហាញទិដ្ឋភាពផ្សេងៗនៃរបស់ដែលខ្លួនបានរក្សាទុកមក។

ក្នុងការតាំងលើកនេះ ថ្មឋានព្រះច័ន្ទត្រូវបានដាក់បង្ហាញ ជាមួយនឹងការពន្យល់ និងប្រវត្តិយ៉ាងក្បោះក្បាយ។ ថ្មនេះ ត្រូវបានធ្វើអំណោយដល់ប្រទេសកម្ពុជា តាមរយៈលោក Emory Swank ឯកអគ្គរដ្ឋទូតសហរដ្ឋអាមេរិក អមជាមួយនឹងលិខិតមួយច្បាប់ពីលោកប្រធានាធិបតី Nixon ប្រគល់ជូនដល់ឯកឧត្តមបណ្ឌិត កែវ សង់គីម រដ្ឋមន្រ្តីក្រសួងអប់រំជាតិកម្ពុជា កាលពីថ្ងៃទី ១៩ ខែកក្កដា ឆ្នាំ ១៩៧៣។ ផ្នែកមួយនៃលិខិតនោះមានសេចក្តីថា «បើមនុស្សនៃប្រជាជាតិជាច្រើនអាចធ្វើរួមគ្នាដើម្បីសំរេចក្តីសុបិនរបស់មនុស្សជាតិនៅក្នុងអវកាសបាន ជាការពិតណាស់ យើងអាចធ្វើរួមគ្នាដើម្បីសំរេចក្តីសុបិនរបស់មនុស្សជាតិដែលចង់បានសន្តិភាពនៅលើផែនដីនេះបាន»។

ស្ថានទូតសហរដ្ឋអាមេរិកបានបញ្ជាក់ថា ខ្លួនផ្តល់អាទិភាពដល់កម្មវិធី និងសកម្មភាពទាក់ទងនឹងផ្នែកវិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា (STEM) ដើម្បីជំរុញការអភិវឌ្ឍបន្ថែមទៀតរបស់ប្រទេសកម្ពុជា។ ហើយសង្ឃឹមថា ការតាំងបង្ហាញនេះនឹងជំរុញទឹកចិត្តអោយយុវជនចាប់យកអាជីពដែលប្រើជំនាញ STEM ៕

[caption id="attachment_73757" align="alignnone" width="620"]

In this July 16, 1969 photo, Neil Armstrong waving in front, heads for the van that will take the crew to the rocket for launch to the moon at Kennedy Space Center in Merritt Island, Fla. (AP Photo/File)[/caption]