ភ្នំពេញ៖ កាលពីចូលថ្ងៃទី១៦ ខែមិថុនា ឆ្នាំ២០១៨ មន្ដ្រីនគរបាលម្នាក់ ត្រូវបានចោរមួយក្រុមចូលគាស់ផ្ទះ យករថយន្ដមួយគ្រឿង ម៉ាក Luxes ពាក់ស្លាកលេខភ្នំពេញ2AL-0768 ស្ថិតក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ។

ជនរងគ្រោះឈ្មោះ កែ សេរីវឌ្ឍនា ជាមន្ដ្រីនគរបាល បម្រើការនៅអគ្គស្នងការនគរបាលជាតិ បានឲ្យដឹងថា រថយន្ដមួយគ្រឿង ម៉ាក Luxes ពាក់ស្លាកលេខភ្នំពេញ2AL-0768 នៅយប់មិញនេះ គាត់មិនសម្រាកនៅផ្ទះនោះទេ លុះមកដល់ផ្ទះវិញនៅព្រឹកឡើង ស្រាប់តែឃើញទ្វាររបងបើក ក៏ផ្អើលឆោឡោតែម្ដង។ បើតាមជនរងគ្រោះបានឲ្យដឹងទៀតថា កែ សេរីវឌ្ឍនា ក្រុមចោរមិនត្រឹមតែគាស់យករថយន្ដនោះទេ ពោលបានចូលរើកកកាយទូរដាក់ឥវ៉ាន់នៅក្នុងផ្ទះផងដែរ ប៉ុន្ដែជនរងគ្រោះថា មិនបានបាត់អ្វីនោះទេ ក្រៅពីរថយន្ដមួយគ្រឿងខាងលើ។ យ៉ាងណាមិញ លោក កែ សេរីវឌ្ឍនា ក៏បានអំពាវនាវដល់សមត្ថកិច្ចជំនាញ ជួយបន្ដស្រាវជ្រាវរករថយន្ដរបស់ខ្លួនដោយយកចិត្តទុកដាក់ផង និងអំពាវនាវដល់សាធារណៈជន ប្រសិនបើប្រទះឃើញរថយន្ដខាងលើ សូមជួយរាយការណ៍ជូនសមត្ថកិច្ចដែលនៅក្បែរ៕ ដោយ៖ វិសុទ្ធ