ក្រុមមន្ត្រីកាំកុងត្រូល នាំគ្នាចុះត្រួតពិនិត្យនៅក្នុងផ្សារទឹកថ្លា ដើម្បីរកសារធាតុថ្នាំគីមីដែលគេតែងលួចដាក់ក្នុងបន្លែ ត្រី សាច់ ម្ហូបអាហារផ្សេងៗ ដែលនាំឲ្យប៉ះពាល់ ដល់សុខភាព

ភ្នំពេញ ៖ នៅព្រឹកថ្ងៃទី១២ ខែមិថុនា ឆ្នាំ២០១៨ នេះក្រុមមន្ត្រីកាំកុងត្រូល ដែលមានជំនាញផ្នែកត្រួតពិនិត្យរកសារធាតុពុលនៃថ្នាំគីមី បាននាំគ្នាចុះត្រួតពិនិត្យនៅក្នុងផ្សារទឹកថ្លា សង្កាត់ទឹកថ្លា ខណ្ឌសែនសុខ ដើម្បីរកសារធាតុថ្នាំគីមីដែលគេតែងលួចដាក់ក្នុងបន្លែ ត្រី សាច់ ម្ហូបអាហារផ្សេងៗដែលនាំឲ្យប៉ះពាល់ដល់សុខភាពប្រជាពលរដ្ឋ ដែលធ្លាប់មានបាតុភាពកើតឡើងនាពេលកន្លងមក។

នៅក្នុងប្រតិបត្តិបង្ក្រាបនោះ ដឹកនាំដោយលោក ង៉ែត ចេក ប្រធានសាខាកាំកុងត្រូលតំបន់សេដ្ឋកិច្ចពិសេសព្រមទាំងមន្ត្រីសំខាន់ៗមួយចំនួនទៀត និងលោកពៅ សារ៉ុម ប្រធានផ្សារទឹកថ្លា។ ក្រុមមន្ត្រីខាងលើបានឲ្យដឹងថា មានត្រីសាច់បន្លែផ្លែឈើនិងគ្រឿងសមុទ្រផ្សេងៗសរុបចំនួន២១មុខ ត្រូវបានប្រមូលយកមកធ្វើការត្រួតពិនិត្យជាក់ស្តែងដើម្បីរកសារធាតុគីមីពុលដែលប៉ះពាល់ដល់សុខភាពអ្នកបរិភោគ ប៉ុន្តែជាលទ្ធផលពុំមានសារធាតុគីមីអ្វីទាំងអស់។

ផ្សារទឹកថ្លា ត្រូវបានក្រុមមន្ត្រីជំនាញខាងលើចុះមកត្រួតពិនិត្យជាច្រើនលើកមកហើយ ដែលកន្លងមករកឃើញមានសារធាតុគីមីពុលដាក់នៅក្នុងគ្រឿងសមុទ្រប្រមាណជិត១០គីឡូក្រាមនៅទីនោះ។ សារធាតុគីមីពុលកន្លងមក ក៏ដូចបច្ចុប្បន្នតែងត្រូវបានគេលួចដាក់ក្នុងចំណីអាហារដូចស្លឹកគ្រៃ ត្រី សាច់ និងផ្លែឈើផ្សេងៗ ដើម្បីកុំវាបាត់បង់សម្រស់ (ស្រពោន) ឬ ឆាប់ស្អុយរលួយ និងឲ្យល្អមើល ប៉ុន្តែវាប៉ះពាល់ដល់សុខភាពអ្នកបរិភោគ។

ក្រុមអ្នកលក់ដូរ(អាជីវករ)បាននិយាយថា ទំនិញផ្នែកម្ហូបអាហារដែលសំបូរសារធាតុគីមី ច្រើនជាងគេបំផុតគឺច្រើនតែនាំចូលមកពីប្រទេសវៀតណាម គឺ១០០% សុទ្ធតែប្រើថ្នាំគីមីទាំងអស់សូម្បីតែស្រូវអង្ករក៏ដាក់ថ្នាំគីមីដែរ។ បើមើលសោភ័ណ្ឌភាព សម្រស់គឺដាច់ តែពេលហូបរួចក៏គ្រោះថ្នាក់ជាងគេដែរ កើតជំងឺក្រពះ និងពោះវៀន ឬមហារីកពេញមន្ទីរពេទ្យ។ ដោយសារតែបាតុភាពមិនល្អខាងលើនេះហើយ ទើបរដ្ឋាភិបាលបានខិតខំណែនាំមន្ត្រីជំនាញឲ្យប្រឹងប្រែងបំពេញកិច្ចការបង្ក្រាបថ្នាំគីមីដាក់ក្នុងចំណីអាហារនេះឲ្យបានគ្រប់ទីកន្លែង៕