មេឈ្មួញឈើវៀតណាម ផាម ថេគឿង ត្រូវបានសាលាដំបូងខេត្តដោះលែងឲ្យមានសេរីភាពវិញ និង មិនមានការចោទប្រកាន់តាមផ្លូវច្បាប់ទេ...

រតនគិរី ៖ មេឈ្មួញវៀតណាមម្នាក់ ដែលជាប់ពាក់ព័ន្ធនឹងករណីប្រមូលទិញឈើនៅស្រុកវើនសៃ ហើយត្រូវសមត្ថកិច្ចចាប់ខ្លួននោះ ពេលនេះបានត្រូវសាលាដំបូងខេត្តដោះលែងឱ្យមានសេរីភាពវិញ និង មិនមានការចោទប្រកាន់តាមផ្លូវច្បាប់ទេ ។ មេឈ្មួញឈើវៀតណាមរូបនេះ ឈ្មោះ ផាម ថេគឿង ភេទប្រុស អាយុ៤១ឆ្នាំ កាន់លិខិតឆ្លងដែនលេខC០០៣១១៦២ មានស្រុកកំណើតនៅខេត្តហាយផុង ប្រទេសវៀតណាម ។

សូមរំឭកថា ឈ្មួញឈើវៀតណាមខាងលើនេះ ត្រូវបាននគរបាលអន្តោប្រវេសន៍ខេត្ត ឃាត់ខ្លួនកាលពីថ្ងៃទី១៤ មិថុនា កន្លងទៅ ខណៈរូបគេកំពុងឈរពិនិត្យឈើនៅក្នុងចម្ការស្វាយចន្ទីមាត់ទន្លេសេសាន ស្ថិតក្នុង ភូមិប៉ុងលើ ឃុំប៉ុង ស្រុកវើនសៃ រួចនាំមកកាន់ស្នងការដ្ឋាននគរបាលខេត្ត ដើម្បីសាកសួរនិងចាត់ការតាមនីតិវិធី ។ លុះមកដល់ថ្ងៃទី១៦ ខែមិថុនា មេឈ្មួញឈើវៀតណាមរូបនេះ ត្រូវបានបញ្ជូនទៅសាលាដំបូងខេត្ត ដើម្បីផ្តន្ទាទោសតាមច្បាប់ ប៉ុន្តែនៅវេលាម៉ោងប្រមាណ១១ព្រឹក ថ្ងៃទី១៧ ខែមិថុនា ស្រាប់តែគេឃើញមន្ត្រីនគរបាលម្នាក់ដឹកឈ្មួញវៀតណាមនេះចេញពីបរិវេណតុលាការតាមរថយន្តហាយឡែនឌ័រ១គ្រឿង យ៉ាងតក់ក្រហល់គេចពីក្រុមអ្នកកាសែត ។

ពាក់ព័ន្ធនឹងរឿងខាងលើនេះ លោក សួស ឡា ប្រធានសាលាដំបូងខេត្ត បានប្រាប់អ្នកយកព័ត៌មានតាមទូរស័ព្ទយ៉ាងខ្លី កាលពីវេលាម៉ោងជាង២រសៀលថ្ងៃទី១៧ ខែមិថុនាថា រូបលោកជាប់ប្រជុំនៅភ្នំពេញ រួចបង្វែរឱ្យសួរអ្នកនាំពាក្យសាលាដំបូងវិញ ។ ចំណែកលោក កែវ ពិសុទ្ធ ប្រធានលេខាធិការដ្ឋាននិងជាអ្នកនាំពាក្យសាលាដំបូងខេត្តបានប្រាប់ថា លោកមិនទាន់បានដឹងរឿងហ្នឹងនៅឡើយទេ ពោលគឺនៅដៃអយ្យការនៅឡើយ ដូច្នេះសូមរង់ចាំកន្លះម៉ោងទៀត ។

ប្រភពព័ត៌មានដោយឡែកទៀតបង្ហើបប្រាប់ក្រៅផ្លូវការថា មានមន្ត្រីនគរបាលថ្នាក់ខ្ពស់ម្នាក់នៅស្នង ការដ្ឋាននគរបាលខេត្ត ជាអ្នករត់ការដោះលែងមេឈ្មួញឈើវៀតណាមនោះ ។ សូមបញ្ជាក់ថា គំនរឈើរបស់ឈ្មួញវៀតណាមនោះ បានត្រូវសមត្ថកិច្ចចាប់រឹបអូសកាលពីថ្ងៃទី១៤ ខែមិថុនា ហើយបើតាមមន្ត្រីនគរបាលដែលចុះចាប់ផ្ទាល់និយាយថា ឈើនោះមិនទាន់ដឹងពីចំនួនច្បាស់លាស់នៅឡើយទេ និងដឹកយកមករក្សាទុកនៅសាលាស្រុកវើនសៃចំនួន៣គោយន្តប៉ុណ្ណោះ ៕