ភ្នំពេញ៖ នារីរងគ្រោះ ដែលសុំមិនបញ្ចេញឈ្មោះ ប្រាប់ថា ខ្លួនមានអាយុ២១ឆ្នាំ ជាបុគ្គលិកបម្រើការនៅខារ៉ាអូខេ ញ៉ូស្តារ ស្នាក់នៅសង្កាត់ផ្សារដើមគ ខណ្ឌទួលគោក មានស្រុកកំណើតនៅឯខេត្តសៀមរាប កាលពីវេលាម៉ោង២និង២០នាទីរំលងអធ្រាត្រ ឈានចូលថ្ងៃទី២៩ ខែមិថុនា ឆ្នាំ២០១៨នេះ ត្រង់ចំណុចខាងក្រោយអតីតខារ៉ាអូខេ ញ៉ូស្តារ តាមបណ្តោយផ្លូវលំបេតុង១០B ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ សមត្ថកិច្ចបានប្រាប់ថា នៅមុនពេលកើតហេតុ គាត់បានធ្វើដំណើរថ្មើរជើងតែម្នាក់ឯង តាមបណ្តោយផ្លូវ១០B ក្នុងទិសដៅពីកើតទៅលិច ដែលទើបតែចេញមកពីកន្លែងធ្វើការបំណងដើរទៅផ្ទះរបស់មិត្តភ័ក្ត ដែលនៅក្បែរកន្លែងកើតហេតុ។ លុះមកដល់ចំណុចកើតហេតុ ក៏ស្រាប់តែលេចមុខក្រុមជនសង្ស័យចំនួនពីរនាក់ ជិះម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ មិនចាំស្លាកលេខ មកពីក្រោយ រួចបានធ្វើសកម្មភាពឆក់កាបូបស្ពាយពីនាង ដែលស្ពាយនៅនឹងស្មារបានសម្រេច បណ្តាលឲ្យនាងដួលរងរបួសរលាត់ដៃរលាត់ជើង។ បន្ទាប់ពីធ្វើសកម្មភាពហើយ ក្រុមចោរបានបន្ថែមល្បឿន ជិះរត់គេចខ្លួនបាត់ស្រមោលដោយសុវត្ថិភាព៕
