ខេត្តតាកែវៈ នៅ​ថ្ងៃទី០១ ខែកក្កដា ឆ្នាំ២០១៨ មាន​ករណី​គ្រោះថ្នាក់​ចរាចរណ៍​មួយ ​កើតឡើង​រវាង​ម៉ូតូ​និង​រថយន្ត ក្នុងទិសដៅ​ស្រប​ទិស​គ្នា ​ពី​ជើង​ទៅ​ត្បូង នៅលើ​ផ្លូវជាតិ​លេខ៣ ចន្លោះ​គីឡូម៉ែត្រ៧៤-៧៥ ក្នុងភូមិ​អង្គតាសោម ឃុំ​អង្គតាសោម ស្រុក​ត្រាំកក់ ខេត្តតាកែវ ។

ម៉ូតូ​ម៉ាក​ហុងដា MSX ពណ៌​ក្រហម គ្មាន​ផ្លាកលេខ បើកបរ​ដោយ​ឈ្មោះ ងិន សុធា​រ៉ា ភេទ​ប្រុស អាយុ២៥ឆ្នាំ (រងរបួស​ធ្ងន់) ដែល​បើកបរ​មកពី​ទិស​ខាងជើង លុះ​បើកបរ​មកដល់​ចំណុច​ខាងលើ​ក៏បាន​បុក​គ្នា​ជាមួយ រថយន្ត​មួយគ្រឿង​ម៉ាក​ឡិច​ស៊ី​ស ពណ៌​ស ពាក់​ផ្លាកលេខ ភ្នំពេញ 2AS 3230 (អ្នកបើកបរ​គេចខ្លួនបាត់)។ ជនរងគ្រោះ​ត្រូវបាន​ដឹក​ទៅ​សង្គ្រោះ​នៅ​មន្ទីរពេទ្យបង្អែក​ក្រុង​ដូន​កែវ ក្រោយមក​សមត្ថកិច្ច​ក៏បាន​ចុះមក​ដល់​រួច​កសាង​សំណុំរឿង​ទៅតាម​នីតិវិធី។