ភ្នំពេញៈ ​កាលពី​វេលា​ម៉ោង៦ព្រឹក ថ្ងៃទី៤ ខែកក្កដា ឆ្នាំ២០១៨ ស្ថិតនៅលើ​ស្ពាន​ជ្រោយចង្វារ​ថ្មី សង្កាត់​ស្រះចក ខណ្ឌដូនពេញ រាជធានី​ភ្នំពេញ។ មានហេតុការណ៍​ភ្ញាក់ផ្អើល​ មួយដោយបុរស​ម្នាក់​មាន​វិបត្តិ​ក្នុង​គ្រួសារ ខឹង​ប្រពន្ធ​មាន​ប្តី​ថ្មី ខូចចិត្ត​នាំ​កូនស្រី​អាយុ៧ឆ្នាំ មក​លោតទឹក​សម្លាប់ខ្លួន ខណ:ដែល​ឪពុក​លិច​ក្នុង​ទន្លេ​បាត់ រីឯ​កូនស្រី​វិញ ត្រូវបាន​គេ​ជួយ​ស្រង់​ទាន់ពេល។ ឪពុក​ដែល​នាំ​កូន​មក​លោតទឹក​សម្លាប់ខ្លួន​នោះ​ឈ្មោះ ទៀង អាយុ៣០ មុខរបរ​នៅផ្ទះ ឯ​កូនស្រី ឈ្មោះ ហង្ស លីហ្សា អាយុ៧ឆ្នាំ ស្នាក់នៅ​ជាមួយ​ឪពុក នៅ​សង្កាត់​ទួល​សង្កែ ខណ្ឌ​ឬ​ស្សី​កែវ។

ចំណែក​ស្ត្រី​ជា​ម្តាយ ដែលមាន​ប្តី​ថ្មី​នោះ នៅ​ម្តុំ​ផ្សារ​សិន​ជូ​រី ក្នុង​ខណ្ឌ​ពោធិ៍​សែន​ជ័យ រាជធានី​ភ្នំពេញ មុខរបរ​ជា​កម្មការិនី​រោងចក្រ។ នៅ​មុនពេល​កើតហេតុ បុរស​ជា​ឪពុក បាន​និយាយ​កុហក​កូន​ថា នាំ​កូន​មក​ហាត់ប្រាណ តែ​បែរជា​នាំមក​លោតទឹក​ពីលើ​ស្ពាន​ជ្រោយចង្វារ ដោយ​បុរស​ជា​ឪពុក​បាន​លិច ទៅក្នុង​ទឹកទន្លេ​បាត់ ហើយ​កូនស្រី​ត្រូវបាន​ខ្មែរឥស្លាម ដែល​ជិះទូក​ក្នុង​ទន្លេ​នៅក្បែរនោះ ជួយ​ទាន់ពេលវេលា៕