ថៃ៖ ទីបំផុតក្រុមក្មេងៗទាំង១២នាក់ រួមជាមួយនឹងគ្រូបង្វឹក ដែលបានបាត់ខ្លួននៅក្នុងរូងភ្នំក្នុងខេត្ត Chiang Rai ប្រទេសថៃ ត្រូវបានគេរកឃើញហើយ ដោយក្រុមក្មេងទាំងនោះនៅរស់មានជីវិតទាំងអស់។ តែបញ្ហាមួយដំណាក់កាលទៀតនោះ គឺជាការនាំពួកគេចេញមកពីក្នុងរូងភ្នំនោះ ដែលជារឿងដ៏លំបាកមួយ និងអាចចំណាយពេលដល់រាប់ខែ ឯណោះ។

ជាមួយនឹងការទ្រាំទ្រ អត់អាហារ គ្មានពន្លឺថ្ងៃ ជិត១០ថ្ងៃនោះ មានមហាជនជាច្រើនសម្តែងនូវការងើយឆ្ងល់ជាច្រើនថាតើ គ្រូបង្វឹក និងក្មេងៗ ធ្វើយ៉ាងណាទើបអាចនៅមានជីវិតបាន។ យ៉ាងណាមិញក៏មានការបកស្រាយថាគ្រូបង្វឹកអាយុ២៥ឆ្នាំ មិនឲ្យក្មេងៗធ្វើចលនាច្រើន ដើម្បីសន្សំថាមពល មិនឲ្យផឹកទឹកល្អក់ដែលហូរនៅដី គឺផឹកតែទឹកហូរតាមជញ្ជាំង ព្រមទាំងបែងចែកអាហារ និងភេសជ្ជៈ ដែលបានខ្ចប់យកមកឲ្យក្មេងៗញុំ តែខ្លួនឯងញាំុតែបន្តិចបន្តួចទេ។ រួមជាមួយគ្នានោះគ្រូបង្វឹករូបនោះ ក៏បានធ្វើឲ្យមហាជនភ្ញាក់ផ្អើលនូវវិធីមួយផ្សេងទៀត ដោយលោកបានឲ្យដឹងថា លោកធ្លាប់បួសជាព្រះសង្ឃ ហើយនៅពេលដែលជាប់នៅក្នុងរូងភ្នំជិត១០ថ្ងៃនេះ លោកបានឲ្យកូនក្រុម រក្សាការតាំងសមាធិ រក្សាភាពស្ងប់ស្ងាត់ វាក៏ជាវិធីធ្វើឲ្យមានចិត្តស្ងប់ និងកុំឲ្យមានការស្រេកឃ្លានបានខ្លះផងដែរ ហេតុនេះទើបនាំអោយពួកគេឆ្លងផុតគ្រោះលើកនេះ៕ ប្រភព៖ biz-kh