ភូមា៖ ដូចប្រិយមិត្តបានជ្រាបរួចមកហើយថា រឿងរ៉ាវបាត់ខ្លួនដ៏អាថ៌កំបាំងរបស់ក្រុមកីឡាករបាល់ទាត់វ័យក្មេង ១២នាក់ រួមទាំងគ្រូបង្វឹកវ័យ ២៥ឆ្នាំ នៅក្នុងរូងភ្នំថាំហ្លួង ខេត្តឈៀងរ៉ៃ ប្រទេសថៃ បានផ្ទុះកក្រើកជាខ្លាំងដល់បណ្តាប្រទេសដទៃលើពិភពលោក រហូតរយៈពេល៩ថ្ងៃ ទើបត្រូវបានរកឃើញ ដោយក្រុមអ្នករាវរកតាមទឹកជំនាញ មកពីចក្រភពអង់គ្លេស កាលពីយប់ថ្ងៃច័ន្ទ ទី២ កក្កដា ឆ្នាំ២០១៨ កន្លងទៅនេះ។

ទន្ទឹងនឹងនេះ ជុំវិញនឹងករណីខាងលើនេះដែរ ក៏មានមហាជនជាច្រើន ជាពិសេស ជនជាតិថៃតែម្តង ពិតជាមានការភ្ញាក់ផ្អើលជាខ្លាំង ចំពោះការនិមន្តមកដល់របស់ព្រះសង្ឃភូមា បាប៊ុនឈុំ ដែលមានកិត្តិនាមល្បី៣ប្រទេស ថៃ ឡាវ និងភូមា បារមីខ្លាំងពូកែ មកប្រារព្ធពិធីបួងសួងបែបសាសនា នៅទីតាំងមុខល្អាងរូងភ្នំថាំហ្លួង និងថែមទាំងបានសន្យា ដោយមានសង្ឃដីកាយ៉ាងខ្លីថា អ្នកទាំង១៣នាក់ ដែលបានបាត់ខ្លួននោះ មិនយូរទេរយៈពេល២ថ្ងៃទៀត នឹងអាចរកពួកគេឃើញហើយ។ រហូតនៅទីបំផុត ការលើកឡើងតាមរយៈសង្ឃដីការរបស់ព្រះអង្គ ក៏បានក្លាយជាការពិត ដែលរឹតតែធ្វើឲ្យគ្រប់គ្នានឹកស្មានមិនដល់ នឹងមានជំនឿជឿជាក់កាន់តែខ្លាំង ទៅលើបារមីឫទ្ធិអំណាចរបស់ព្រះអង្គទ្វេឡើង។ ប្រភព៖ biz-kh