មួយពាន់នាក់មានមួយ!!! ឃាត់ខ្លួននារីវ័យក្មេងម្នាក់ ដែលជាជនសង្ស័យ បានយកម៉ូតូមិត្តភក្ដិទៅបាត់អស់រយះពេល៣ខែ ត្រូវម្ចាស់តាមរកឃើញ ហើយឃាត់ខ្លួនឲ្យសមត្ថកិច្ច

ភ្នំពេញៈ កាលវេលាម៉ោង៦ៈ២៥នាទី ល្ងាចថ្ងៃទី៤ ខែកក្កដា ឆ្នាំ២០១៨ នៅប៉ុស្តិ៍នគរបាលចោមចៅ៣ ខណ្ឌពោធិ៍សែនជ័យ រាជធានីភ្នំពេញ នារីម្នាក់ដែលជាជនសង្ស័យ បានយកម៉ូតូមិត្តភក្ដិទៅបាត់អស់រយះពេល៣ខែ ត្រូវម្ចាស់តាមរកឃើញ ហើយឃាត់ខ្លួនឲ្យសមត្ថកិច្ច ។

ជនរងគ្រោះឈ្មោះ សេង ស្រីម៉ៅ ភេទស្រី អាយុ២៧ឆ្នាំ មុខរបរកម្មកររោងចក្រ ស្នាក់នៅភូមិត្រពាំងជ្រៅ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតនៅភូមិតាមុំ ឃុំពោធិ៍រាជ ស្រុកស្វាយជ្រំ ខេត្តស្វាយរៀង។ ចំណែកនារីជនសង្ស័យមានឈ្មោះ ជា ស្រីដា ភេទស្រី អាយុ២៥ឆ្នាំ មុខរបរកម្មកររោងចក្រ ស្នាក់នៅភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល មានស្រុកកំណើតនៅភូមិ ក្រូចឆ្មារ ឃុំក្រូចឆ្មារ ស្រុកចំការលើ ខេត្តកំពង់ចាម។ រីឯម៉ូតូមួយគ្រឿងដែលជនសង្ស័យឆបោកម៉ាកឌ្រីមសង់ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1FG-5414។

តាមប្រភពព័ត៌មានពីជនរងគ្រោះបានឲ្យដឹងថា កាលពីវេលាម៉ោង៦ល្ងាចថ្ងៃទី២៤ ខែមេសា ឆ្នាំ២០១៨ ជនរងគ្រោះនិងជនសង្ស័យជាមិត្តភក្ដិនឹងគ្នា បាននាំគ្នាមកទិញម្ហូបនៅផ្សារ QMI ស្ថិតក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ តែជនរងគ្រោះមិនចេះជិះម៉ូតូបានឲ្យជនសង្ស័យជាអ្នកឌុបដើម្បីមកផ្សារទិញម្ហូប បន្ទាប់មកជនរងគ្រោះបានចុះទៅទិញម្ហូប ហើយជនសង្ស័យបានប្រាប់ទៅនារីរងគ្រោះថា «ខ្ញុំទៅចាំកន្លែងហូបបង្អែមសព្វដង» ដែលជិតកន្លែងជនរងគ្រោះទិញមកហូប។ បន្ទាប់មកជនសង្ស័យបានជិះចេញទៅបាត់ ចំណែកជនរងគ្រោះពេលទិញម្ហូបរួចហើយបានដើរទៅកន្លែងបង្អែមដែលធ្លាប់ហូប តែមិនឃើញជនសង្ស័យឡើយ បន្ទាប់មកជនរងគ្រោះបានខ្ចីទូរស័ព្ទអ្នកលក់នៅជិតកន្លែងកើតហេតុដែរ តែជនសង្ស័យមិនលើកទូរស័ព្ទឡើយ បន្ទាប់មកជនរងគ្រោះបានឲ្យប្តីទៅដាក់ពាក្យបណ្តឹងជំនួសភ្លាមៗផងដែរ។ លុះនៅថ្ងៃកើតហេតុ មិត្តភក្ដិម្នាក់ទៀតបានឃើញជនសង្ស័យខាងលើធ្វើការរោងចក្រ នៅម្តុំព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល ដែលកំពុងដើរទិញម្ហូប ភ្លាមៗនោះជនរងគ្រោះនិងប្តីបានទៅឃាត់ជនសង្ស័យនាំមក ប៉ុស្តិ៍ចោមចៅ៣ ហើយប្រគល់ឲ្យសមត្ថកិច្ចដើម្បីសួរនាំតែម្តង ។