ភ្នំពេញ៖យុវជនពីរនាក់ជិះស៊ុយស័រគីឡែតមួយគ្រឿងទើបតែចេញពីធ្វើការបំរុងជិះត្រឡប់ទៅផ្ទះហើយក៏ត្រូវជនសង្ស័យមួយក្រុមជិះដេញតាមវាយប្លន់យកម៉ូតូបានសម្រេចរួចជិះរត់គេចខ្លួនបាត់ស្រមោលដោយសុវត្តិភាព។ ហេតុការណ៍នេះកើតឡើងកាលពីម៉ោង៩និង៥០នាទីយប់ ថ្ងៃទី០៩ ខែកក្កដា ឆ្នាំ២០១៨ត្រង់ចំណុចខាងមុខស្ថានីយព្រេងឥន្ធនះ តូតាល ក្បែរសយុនកំសាន្តចំការព្រីញ តាមបណ្តោយផ្លូវ២០១១ ស្ថិតសង្កាត់គោកឃ្លាង ខណ្ឌសែនសុខ។

ជនរងគ្រោះទី១ជាអ្នកបើកម៉ូតូមានឈ្មោះ កាន​ តុលា​ ភេទ​ប្រុស​ អាយុ២៤​ឆ្នាំ​ ជា​កម្មករ​រោងចក្រ​ ស្នាក់​នៅ​បន្ទប់ជួលម្តុំវ​ត្តតាំងក្រសាំង សង្កាត់​កាកាបទី២ ខណ្ឌ​ពោធិ៍​សែន​ជ័យ​។ ទី២ជាអ្នកអង្គុយពីក្រោយមានឈ្មោះ​ ហិន​ រដ្ឋា​ ភេទ​ប្រុស​ អាយុ​២៣​ឆ្នាំ ជាកម្មករ​ រោងចក្រ​ ស្នាក់​នៅ​ជាមួយគ្នា។ បើតាមសម្តីពីជនរងគ្រោះបានរៀបរាប់ប្រាប់អោយដឹងថានៅមុនពេលកើតហេតុរូបគេទាំងពីរនាក់គឺទើបតែចេញមកពីកន្លែងធ្វើការនៅម្តុំរង្វង់មូលចោមចៅហើយបំណងត្រលប់ទៅបន្ទប់ជួលវិញនៅម្តុំវត្តតាំងក្រសាំង ដោយបើកបរម៉ូតូមួយគ្រឿងម៉ាក ស៊ុយស័រគីឡែត ពណ៌សលាយខៀវ ពាក់ស្លាកលេខ តាកែវ1P-4836 តាមបណ្តោយផ្លូវសហព័ន្ធរ៉ុស្សី ក្នុងទិសដៅពីត្បូងទៅជើងនិងក្នុងល្បឿនលឿន។ លុះមកដល់ខាងមុខអាកាសយន្តដ្ឋានភ្នំពេញអន្តរជាតិពោធិ៍ចិនតុង ក៏ស្រាប់តែលេចមុខជនសង្ស័យមួយក្រុមមានគ្នាបួននាក់ជិះម៉ូតូពីរគ្រឿងម៉ាក ហុងដាឌ្រីម មិនចាំស្លាកលេខ ជិះមកពីក្រោយហើយបានស្រែកដាក់ជនរងគ្រោះថា ពួកហែងជិះម៉ូតូឈ្លើយម្លេះ ថែមទាំងដកខ្សែក្រវាត់វាយទៅលើជនរងគ្រោះទាំងពីរនាក់ថែមទៀតផង។ ប្រភពដដែលបន្តថា ភ្លាមៗនោះដោយជនរងគ្រោះភ័យស្លន់ស្លោខ្លាំងពេកក៏បានជិះម៉ូតូរត់គេចខ្លួនទៅខាងមុខទៀតទាំងហួសផ្លូវចូលបន្ទប់ជួលរបស់ពួកគេ។ ហើយក្រុមជនសង្ស័យក៏បន្តជិះដេញតាមវាយជនរងគ្រោះទាំងពីរនាក់ខាងលើ រហូតទៅដល់ចំណុចកើតហេតុដោយជនរងគ្រោះភ័យស្លន់ស្លោខ្លាំងពេកក៏ចាប់ហ្វ្រាំងម៉ូតូបណ្តាលឲ្យដួល រួចជនរងគ្រោះទាំងពីរនាក់ខាងលើបានងើបរត់ចោលម៉ូតូយករួចខ្លួនទៅឲ្យគេឯងដែលនៅក្បែរនោះជួយ។ ភ្លាមនោះដោយក្រុមជនសង្ស័យឃើញជនរងគ្រោះរត់ចោលម៉ូតូ ឆ្លៀតឱកាសល្អក៏រត់ទៅលើកម៉ូតូរបស់ជនរងគ្រោះជិះរត់គេចខ្លួនទៅបាត់ស្រមោលដោយសុវត្តិភាព។ ក្រោយពេលកើតហេតុជនរងគ្រោះបានត្រឹមតែកាន់កាត់គ្រីម៉ូតូដែលត្រូវក្រុមចោរប្លន់យកទៅខាងលើ ទៅដាក់ពាក្យបន្តឹងនៅប៉ុស្តិ៍នគរបាលរដ្ឋបាលគោកឃ្លាងដោយក្តីសោកស្តាយតែប៉ុន្ណោះ។ គួរបញ្ជាក់ថានេះជាករណីវាយប្លន់យកម៉ូតូលើកទី២ ដែលកើតឡើងនៅថ្ងៃតែមួយនៅក្នុងទឹកដីខណ្ឌសែនសុខ ដោយករណីទី១គឺកើតឡើងកាលពីវេលាម៉ោង២និង២៥នាទីរំលងអធ្រាត្រ ថ្ងៃដដែលនៅក្នុងសង្កាត់ទឹកថ្លា ដែលជនសង្ស័យមួយក្រុមបានធ្វើសកម្មភាពវាយប្លន់យកម៉ូតូស៊ុយស័រគីឡែតមួយគ្រឿងពីយុវជនប្រុសស្រីបីនាក់ដែលទើបតែជិះចេញពីក្លឹប តែមិនបានសម្រេចនោះទេតែបង្កឲ្យរងគ្រោះម្នាក់រងរបួសបែកក្បាលនិងពីរអ្នករងរបួសស្រាល ហើយក្រុមចោរបានជិះរត់គេចខ្លួនដោយសុវត្តិភាព។ ដោយឡែកចំពោះសមត្ថកិច្ចមូលដ្ឋានខណ្ឌសែនសុខហាក់ដូចជាប្រងើយកន្តើយចំពោះការរឹតបន្ទឹងសុវត្តិភាពសន្តិសុខក្នុងមូលដ្ឋាន ដែលបណ្តោយឲ្យកើតមានករណីចោរកម្មកើតមានឡើងជាបន្តបន្ទាប់មិនថាតែករណីប្លន់ខាងលើនោះទេ គឺក៏ធ្លាប់មានករណីលួច ឆក់ជាច្រើនលើកមកហើយផងដែរ៕ ដោយ៖ ភារ៉ា