ភ្នំពេញៈ កាលពីវេលាម៉ោង១០ៈ៤០នាទីព្រឹក ថ្ងៃទី១១ ខែកក្កដា ឆ្នាំ២០១៨ គណៈកម្មការប្រយុទ្ធប្រឆាំងផលិតផល ក្លែងក្លាយនៃក្រសួងមហាផ្ទៃ ចុះបង្ក្រាបទីតាំងស្តុកម៉ូតូ ក្រុមហ៊ុនចិនមួយកន្លែង ស្ថិតក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ យីហោ បូឌីង អុីនវេសមិនខូអិលធីឌី ដែលក្លែងបន្លំ ម៉ាករបស់ក្រុមហ៊ុនហុងដា ដោយបានរកឃើញ ចំនួនជាង៤០០គ្រឿង ព្រមទាំងសម្ភារៈជាច្រើនទៀត ។

តាមសមត្ថកិច្ចបានឲ្យដឹងថា កម្លាំងដឹកនាំដោយលោក ជ័យ រិទ្ធី ជាអនុប្រធាន អគ្គលេខាធិការដ្ឋាន ប្រយុទ្ធប្រឆាំង ផលិតផលក្លែងក្លាយ ក្រសួងមហាផ្ទៃ ចុះទៅត្រួតពិនិត្យ ឆែកឆេ ឃ្លាំងស្តុក និងតម្លើងម៉ូតូសេរីទំនើប ដែលមានឃ្លាំងឈ្មោះ បូឌីង ស្ថិតនៅចំណុចខាងលើ និងឃាត់ខ្លួនម្ចាស់អ្នកគ្រប់គ្រងចំនួន៤នាក់ ក្នុងនោះមានឈ្មោះ LUO YUN ភេទប្រុស ជានជាតិចិន អាយុ៤៥ឆ្នាំ ២.ឈ្មោះ GOU HUAJIN ភេទប្រុស ជនជាតិចិន អាយុ២០ឆ្នាំ ៣.ឈ្មោះ LI SHIHAI ភេទប្រុស ជនជាតិចិន អាយុ៦៧ឆ្នាំ ៤.ឈ្មោះ YANH SHIFANG ភេទស្រី អាយុ៦៣ឆ្នាំ ។ នៅក្នុងប្រតិបត្តិការណ៏នោះ ជាលទ្ធផលសមត្ថកិច្ចបានរកឃើញ ម៉ូតូក្លែងបន្លំម៉ាកនិងម៉ូឌែល ចំនួនជាង៤០០គ្រឿង ក្នុងនោះមានៈ ម៉ាក Zoomer-X ចំនួន២២៤គ្រឿង ម៉ាក MSL-S1 ចំនួន១០០គ្រឿង ម៉ាក Scoopy ចំនួន៣១គ្រឿង ម៉ាក Ducati ចំនួន ០៣គ្រឿង ម៉ាក Dream ចំនួន៣គ្រឿង ម៉ូតូធំផ្សេងៗ ចំនួន ២០គ្រឿង តែម Zoomer-X -MSL-S1 -Scoopy -Ducati -Dream ចំនួន៤កេស ប្រេងសម្រាប់លាយ ប្រេងម៉ាស៊ីន ចំនួន៣៦ប្រអប់ និងគ្រឿងបន្លាស់មួយចំនួន។ ក្រោយប្រតិបត្តិការបានបញ្ចប់ គណៈកម្មការខាងលើ បានដក ហូតម៉ូតូចំនួន ០៤គ្រឿង បួនប្រភេទ យកទៅធ្វើតេស្ត និងហៅ ជនជាតិចិន២នាក់ ទៅសាកសួរនៅនាយកដ្ឋានជំនាញ ក្រសួងមហាផ្ទៃ ។ ដោយឡែកឃ្លាំងខាងលើ ត្រូវបានតុលាការ សម្រេចបិទជាបណ្តោះអាសន្ន រងចាំស្រាវជ្រាវ និងធ្វើតេស្ត ផលិតផលបន្តទៀត ៕