ភ្នំពេញ៖ ជនជាតិវៀតណាមប្រុស ស្រីចំនួន ១១នាក់ ក្នុងនោះមានស្រី១០នាក់ ប្រុសម្នាក់ ត្រូវបានកម្លាំងនគរបាលនាយកដ្ឋានស៊ើបអង្កេត និង អនុវត្តនិតិវិធី នៃក្រសួងមហាផ្ទៃ បានធ្វើការចុះត្រួតពិនិត្យការស្នាក់នៅ និង បំពេញការងារខុសច្បាប់ត្រូវបានឃាត់ខ្លួន កាលពីវេលាម៉ោង ២និង ៣០នាទីរសៀល ថ្ងៃទី១២ ខែកក្កដា ឆ្នាំ២០១៨ នៅតាមបណ្តាហាងម៉ាស្សា និង កោសជប់ មួយចំនួន ដែលមានទីតាំងនៅតាមបណ្តោយផ្លូវលេខ ៣៧១ ក្នុងភូមិព្រែកតាគង់១ សង្កាត់ចាក់អង្រែលើ និង ភូមិក្បាលទំនប់ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ក្នុងប្រតិបត្តិការនេះធ្វើឡើងដោយមានការសម្របសម្រួលដោយលោក សៀង សុខ ព្រះរាអាជ្ញារង នៃអយ្យការអមសាលាដំបូងរាជធានីភ្នំពេញ និងលោក លឹម ស៊ាងហៃ ក្រឡាបញ្ជី ដឹកនាំកម្លាំងដោយ លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយការិយាល័យអន្តោប្រវេសន៍នៃស្នងការដ្ឋានគរបាលរាជធានីភ្នំពេញ រួមនិងនគរបាលខណ្ឌមានជ័យ ផងដែរ ដោយបានចុះទៅត្រួតពិនិត្យការស្នាក់នៅ និងការបំពេញការងារនៅតាមបណ្តាទីតាំងកោសជប់និងម៉ាស្សារមួយចំនួនតាមបណ្តោយផ្លូវ៣៧១ ។ ជាក់ស្តែង សមត្ថកិច្ចបានធ្វើការឃាត់ខ្លួនជនជាតិវៀតណាមប្រុស ស្រី សរុបចំនួន ១១នាក់ ក្នុងនោះមានបុរសម្នាក់ និងស្រីចំនួន១០នាក់ ដែលកំពុងតែលួចចូលមកស្នាក់នៅ និង បំពេញការងារ ដោយគ្មានឯកសារត្រឹមត្រូវ។ ក្រោយពីបញ្ចប់ប្រតិបត្តិការត្រួតពិនិត្យការស្នាក់នៅ និង បំពេញការងារនេះរួចមក ក្រុមជនជាតិវៀតណាមប្រុស ស្រីទាំង ១១នាក់ខាងលើ ត្រូវបានសមត្ថកិច្ចបញ្ជូនទៅកាន់នាយកដ្ឋានស៊ើបអង្កេត និង អនុវត្តនិតិវិធី នៃក្រសួងមហាផ្ទៃ ដើម្បីចាត់ការទៅតាមនិតិវិធីជាបន្តទៅទៀត៕