ថៃ៖ ក្មេងប្រុសដមព្រំថេបអាយុ១៣ឆ្នាំជាក្មេងប្រុសរងគ្រោះម្នាក់ក្នុងចំណោមក្មេងៗទាំង១២ដែលជាប់នៅក្នុងល្អាងភ្នំ«ថាំហ្លួង»ដោយក្រោយពីជួយសង្គ្រោះដោយសុវត្ថិភាពក្មេងប្រុសរូបនេះបានរៀបរាប់រឿងរ៉ាវប្រាប់ឪពុកម្តាយពីដើមហេតុនាំឱ្យត្រូវជាប់ក្នុងល្អាងភ្នំចេញមិនរួច។

កាលពីវេលាម៉ោង៣រសៀលនៅថ្ងៃទី១២ខែកក្កដាឆ្នាំ២០១៨ឪពុករបស់ក្មេងប្រុសដមព្រំថេបវ័យ៤៥ឆ្នាំបានបង្ហើបរឿងហេតុឱ្យអ្នកសារព័ត៌មានបានដឹងថានៅថ្ងៃទី២៣ខែមិថុនាក្រោយពីហ្វឹកហាត់ចប់ទាំងអស់គ្នាក៏ចូលទៅលេងក្នុងល្អាងភ្នំ«ថាំហ្លួង»ដោយគិតថាគ្រាន់តែចូលលេងប្រហែលជា១ម៉ោងនឹងចេញមកវិញមកហើយដូចនេះក៏នឹកមិនឃើញថាត្រូវទិញចំណីអាហារច្រើនយកទៅតាមខ្លួនមានត្រឹមតែនំបន្តិចបន្តួចក្នុងកាតាបប៉ុណ្ណោះ។ ចូលមិនទាន់បានប៉ុន្មានផងស្រាប់តែមានភ្លៀវធ្លាក់បង្កឱ្យទឹកយ៉ាងច្រើនហូរបុកចូលក្នុងល្អាងភ្នំឃើញដូចនេះគ្រប់គ្នាក៏នាំគ្នារត់សម្រុកចូលកាន់តែជ្រៅទៅៗដើម្បីគេចពីកម្លាំងទឹកដែលហូរបុកមកគ្រប់គ្នាភិតភ័យយ៉ាងខ្លាំងពេលប្រឈមនឹងហេតុការណ៍បែបនេះតែគ្រូបង្វឹកបានប្រាប់ថាពួកយើងប្រញាប់រត់គេចដោយត្រូវដើរលុយទឹកដើម្បីរកច្រកផ្លូវផ្សេងដើម្បីចេញពីល្អាងភ្នំ។ គ្រូបង្វឹកបានយកពិលមកជាមួយឆ្លុះទៅក្រោមទឹកឃើញច្រកតូចៗក៏នាំគ្នាកកាយលើកថ្មចេញដើម្បីរកផ្លូវបន្តដំណើរទៅមុខ។ខណៈនៅជាប់ក្នុងល្អាងភ្នំគ្រូបង្វឹកបានប្រាប់ទាំងអស់គ្នាថាត្រូវអង្គុយឱ្យស្ងៀមរក្សាកម្លាំងហើយប្រសិនជានរណាស្រេកទឹកប្រើពិលដើរទៅរកចន្លោះរូងភ្នំដែលមានទឹកភ្លៀងធ្លាក់ហើយខណៈនោះដែរម្នាក់ៗក៏លែងដឹងថ្ងៃឬយប់មានការនិយាយគ្នាខ្លះដែរគឺដើម្បីបន្ធូរភាពតានតឹង។ នៅថ្ងៃដែលមានក្រុមអ្នកជ្រមុជទឹកអង់គ្លេសចូលមកប្រទះឃើញពួកគេមុនគេគឺពេលនេះទាំងអស់គ្នាគឺសង្ងំនៅទីខ្ពស់ជាងនេះឆ្ងាយណាស់តែដោយឃើញថាមានមនុស្សចូលមកទើបនាំគ្នារត់ចុះមកក្បែរទឹកដើម្បីស្វែងរកការជួយសង្គ្រោះក្រោយពីនេះក៏មានក្រុមជួយសង្គ្រោះរបស់ថៃចូលមកមើលថែរក្សារហូតត្រូវបានជួយរំដោះយកចេញពីល្អាងភ្នំ។ សម្រាប់ពេលនេះអាការរបស់ប្អូនប្រុសដមព្រំថេបផុតពីគ្រោះថ្នាក់ហើយគ្រាន់តែកាលពីជាប់នៅក្នុងល្អាងភ្នំគឺស្រកទម្ងន់អស់ជាង៣ទៅ៤គីឡូក្រាមតែពេលនេះបានកើនឡើងជាង១គីឡូក្រាមវិញហើយ៕ ប្រភព៖ biz-kh.com