បើគិតមកទល់ពេលនេះ ការស្លាប់របស់ នាង Jang Ja Yeon តារាស្រីក្នុងរឿង​ F4 “Boy Over Flower” មានរយៈពេលជិត១០ឆ្នាំមកហើយ ចាប់តាំងពីឆ្នាំ២០០៩ ដោយសារតែនាងធ្វើអត្តឃាត សម្លាប់ខ្លួន។ យ៉ាងណាមិញ កាលពីថ្មីៗនេះដែរ រឿងរ៉ាវរបស់ Jang Ja Yeon ត្រូវបានទម្លាយដោយ មិត្តភ័ក្ដិ​ជិត​ដិត​របស់​អតីត​តារា​សម្ដែង Jang Ja Yeon បង្ហើប​ថា មុន​ពេល​លាចាកលោក នាង​ត្រូវ​បាន​គេ​ចាប់បង្ខំ​ឲ្យ​រួមភេទ​ជា​ក្រុម រង​ការ​វាយ​ដំ និង​មើល​ងាយ ខណៈ​ជន​ដែលរំលោភ​គឺ​សុទ្ធ​តែ​ជា​អ្នក​មាន​អំណាច និង​ឥទ្ធិពល​ក្នុង​វិស័យ​សិល្បៈ។ កាល​ពី​ចុង​ខែ​មិថុនា​កន្លង​ទៅ​នេះ ការិយាល័យ​រដ្ឋ​អាជ្ញា​ក្រុង​សេអ៊ូល ប្រទេស​កូរ៉េ​បាន​ប្រកាស​ថា​នឹង​ស៊ើប​អង្កេត​ឡើង​វិញ​នូវ​រឿង​ក្ដី​​សម្លាប់​ខ្លួនរបស់ អតី​ត​តារា​សម្ដែង​ស្រី Jang Ja Yeon ដែល​បាន​ទទួល​មរណភាព​កាល​ពី​ខែ​មីនា ឆ្នាំ​២០០៩។ យោង​តាម​បណ្ដាញ​ព័ត៌មាន Mydaily កាល​ពី​ថ្ងៃ​ទី​៦​ខែ​កក្កដា​នេះ មិត្តភ័ក្ដិ​ជិត​ស្និទ្ធិ​របស់​តួ​រឿង “កន្លង់​បាក់​ស្លាប​ កុលាប​មាន​ស្នេហ៍” បាន​ឲ្យ​ដឹង​ថា៖ “នាង​មិន​អាច​ទ្រាំ​ជាមួយ​ជីវិត​ទាល់​ច្រក​នោះ។ មុន​ពេល​ស្លាប់ នាង​បាន​រង​គ្រប់​ក្ដី​អាម៉ាស​ទាំង​អស់។​ មិនត្រឹមតែប៉ុណ្ណោះ បើផ្អែកតាមសំបុត្រចុងក្រោយរបស់ Ja Yeon សរសេរមុនពេលនាងស្លាប់ បានរៀបរាប់ក្នុងន័យស្ទើរតែខ្លោចចិត្តថា នាងត្រូវបានគេចាប់បង្ខំរំលោភបូក ច្រើនជាង១០០ដងឯណោះ។ ទោះជាយ៉ាងណាក្តី នៅពេលនេះសំនុំរឿងរបស់ Jang Ja Yeon កំពុងតែរើកកាយជាថ្មី ដោយក្រុមប៉ូលីសជំនាញ ដោយមានភស្តុតាងជាង ៥០០០ ទំព័រអំពីរឿងក្តីមួយនេះ។ ក្នុងនោះដែរ ក្រុមអ្នកសើុបអង្កេតបានបញ្ជាក់ថា Ja Yeon ពិតជាត្រូវគេចាប់បង្ខំរំលោភជាមួយបុរស៣ទៅ៥នាក់ក្នុងពេលតែមួយ។ ម៉្យាងវិញទៀត សម្រាប់សំនុំរឿងក្តី របស់តារាស្រីដ៏កម្សត់រូបនេះ នឹងចេញសេចក្តីប្រកាសជាផ្លូវការនៅដើមខែសីហា ឆាប់ៗខាងមុខនេះហើយ៕