បន្ទាយមានជ័យ ៖ មានហេតុការណ៍គ្រោះថ្នាក់ដោយឧប្បត្តិហេតុមួយ បណ្ដាលឲ្យស្ត្រីវ័យ៥១ឆ្នាំម្នាក់ត្រូវបានខ្សែភ្លើង ឆក់ បណ្ដាលឲ្យស្លាប់ ខណៈពេលបញ្ជូនទៅមន្ទីរពេទ្យ ។ ហេតុការណ៍ដ៏គួរឲ្យសង្វេកខាងលើនេះ បានកើតឡើងនៅចន្លោះវេលាម៉ោង៥ទៅម៉ោង៦ព្រឹក ថ្ងៃពុធ ៦កើតខែទុតិយាសាឍ ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី១៨ខែកក្កដាឆ្នាំ២០១៨ នៅភូមិអូរវែង ឃុំតាបែន ស្រុកស្វាយចេក ខេត្តបន្ទាយមានជ័យ ។

នគរបាលរដ្ឋបាលឃុំតាបែន បានឲ្យដឹងថា៖ស្ត្រីរងគ្រោះ ឈ្មោះ គង់ ណាគ្រី អាយុ៥១ ឆ្នាំ មានទីលំនៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។ មុនពេលកើតហេតុ ស្ត្រីរងគ្រោះបានក្រោកបោសសំរាម នៅក្នុងរោងពិធី សម្រាប់ទទួលភ្ញៀវ ពេលកំពុងតែបោសបោស គាត់ បានឃើញព្រីខ្សែភ្លើងដែលបែក ត្រូវបានគេរុំស្របថង់ និងយកស្បៃសម្រាប់ហាលស្រូវមកគ្របពីលើ ជួនជាស្បៃនោះសើមត្រូវទឹកភ្លៀងផងនោះ គាត់បានយកដៃទៅទាញដើម្បីបោសសម្រាត ក៏ឆក់ បណ្តាលឲ្យរងរបួសធ្ងន់ ហើយក៏បានស្លាប់ ខណៈបញ្ជូនទៅមន្ទីរពេទ្យ។ នគរបាលបានបញ្ជាក់ថា៖នេះគឺជាការឆ្វេសប្រហែស ចំពោះអ្នកតខ្សែភ្លើងឃើញព្រីបែកហើយមិនព្រមផ្លាស់ប្តូរនៅតែយកមកប្រើ ។ ក្នុងនោះដែលនគរបាលប៉ុស្តិ៍ក៏បានអំពាវនាវ សូមឲ្យបងប្អូនប្រើប្រាស់ប្រព័ន្ធភ្លើងឲ្យមានការប្រុងប្រយ័ត្ន ជាពិសេសកុំស្តាយព្រីដែលបែកបាក់ហើយត្រូវផ្លាស់ប្តូរចេញជៀសវាងការគ្រោះថ្នាក់ដោយយថាហេតុ។ បច្ចុប្បន្នសពស្ត្រីរងគ្រោះត្រូវបានរៀបចំធ្វើបុណ្យតាមប្រពៃណី ដោយមានក្រុមការងារ ខ ២៧ ខេត្ត ចុះជួយឃុំនិងភូមិអូរវែងបាននាំយកថវិកានិងសម្ភារៈជួយឧបត្ថម្ភក្នុងកម្មវិធីបុណ្យនោះផងដែរ៕