រាជធានីភ្នំពេញ៖ ទីបំផុត បុរសជនជាតិចិន៣នាក់ ដែលបាននាំគ្នា យកដែកគាស់ថ្នាំអំពៅ ដេញវាយ រថយន្ត និងប៉ុនប៉ងសម្លាប់ស្ត្រីខ្មែរម្នាក់ នៅខណ្ឌពោធិ៍សែនជ័យ ត្រូវបានលោក ប៊ុន ធី ចៅក្រមស៊ើបសួរ នៃសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួន ជាបណ្តោះអាសន្ន នៅពន្ធនាគារ រាជធានីភ្នំពេញ បានសម្រេចចោទប្រកាន់ លើបុរសជាតិចិនទាំង ៣នាក់ ពីបទ ប៉ុនប៉ងឃាតកម្ម យោងតាមមាត្រា២៧ និងមាត្រា ១៩៩ នៃក្រមព្រហ្មទណ្ឌ ហើយនៅរសៀលថ្ងៃទី១៩ ខែកក្កដា ឆ្នាំ២០១៨នេះ។

គួររំលឹកថា សមត្ថកិច្ចបានឃាត់ខ្លួនក្រុមជនត្រូវចោទ ខាងលើកាលពីព្រឹកថ្ងៃទី១៣ ខែកក្កដា ឆ្នាំ២០១៨ មុខហាងកាហ្វេតេស្ត ផ្លូវវេងស្រេង ភូមិចោមចៅ២ សង្កាត់ចោមចៅ២ ខណ្ឌពោធិសែនជ័យ ក្រោយពីពួកគេបាន នាំគ្នា ជិះរថយន្តម៉ាក មេរីឆ្លាម ទៅស្ទាក់ផ្លូវ និងយកដែកគាស់ថ្នាំងអំពៅ វាយរថយន្តរបស់ស្ត្រីរងគ្រោះមួយគ្រឿងម៉ាក កាមរីបាឡែន ព័ណ៌ស ពាក់ស្លាកលេខ ភ្នំពេញ 2AN-1659 ឲ្យខូចខាត និងវាយស្ត្រីរងគ្រោះ បណ្តាលឲ្យរងរបួសធ្ងន់៕