អាណិតកសិករខ្មែរណាស់!!! ដំណាំស្រូវរបស់ប្រជាពលរដ្ឋ នៅឃុំរហាត់ទឹក ស្រុកមង្គលបូរី ប្រមាណជិត២ពាន់ហិចតា កំពុងរងការវាយប្រហារពីគ្រោះទឹកជំនន់ យ៉ាងធ្ងន់ធ្ងរ

បន្ទាយមានជ័យៈ នេះបើតាមការឲ្យដឹងរបស់លោក រ័ត្ន ដាស៊ីណាង អភិបាលស្រុកមង្គលបូរី កាលពីរសៀល ថ្ងៃទី៣១ ខែកក្កដា ឆ្នាំ២០១៨។ ដំណាំស្រូវរបស់ប្រជាពលរដ្ឋ នៅឃុំរហាត់ទឹក ស្រុកមង្គលបូរី ខេត្តបន្ទាយមានជ័យ ប្រមាណជិត២ពាន់ហិចតា កំពុងរងការវាយប្រហារពីគ្រោះទឹកជំនន់។

លោក រ័ត្ន ដាស៊ីណាង អភិបាលស្រុកមង្គលបូរី បានឲ្យដឹងទៀតថា ក្រោយមានភ្លៀងធ្លាក់ជាបន្តបន្ទាប់ ក្នុងរយៈពេលប៉ុន្មានថ្ងៃនេះ ធ្វើឲ្យតំបន់ចំនួន២ របស់ស្រុកមង្គលបូរី ជួបបញ្ហាទឹកជំនន់ គឺនៅឃុំរហាត់ទឹក ស្រែស្រូវរបស់ប្រជាពលរដ្ឋជិត ២ពាន់ហិចតា កំពុងរងការលិចលង់ ហើយក្រុមការងារខេត្ត ដែលរួមមានទាំង មន្ទីរជំនាញធនធានទឹក និងមន្ទីរសាធារណៈការ ដឹកនាំដោយលោក អ៊ុំ រាត្រី អភិបាលរងខេត្តបន្ទាយមានជ័យ បានចុះពិនិត្យជាក់ស្ដែង និងកំពុងដុតដៃដុតជើង កាយប្រឡាយបង្វែរមុខទឹក ដាក់ម៉ាស៊ីនបូមទឹកធន់ធំ បូមរំដោះទឹកជំនន់ ដើម្បីជួយឲ្យបងប្អូនប្រជាពលរដ្ឋ អាចប្រមូលផលស្រូវបានតាមលទ្ធភាព ព្រោះស្រូវរបស់ពួកគាត់កំពុងទុំ។

ជាមួយគ្នានេះ លោក យឹម ប៊ុនរុំ ប្រធានមន្ទីធនធានទឹក និងឧតុនិយមខេត្តបន្ទាយមានជ័យ បានបញ្ជាក់ថា ខេត្តបន្ទាយមានជ័យ មានស្រុក.ក្រុងចំនួន២ ដែលកំពុងរងផលប៉ះពាល់ដោយជំនន់ទឹកភ្លៀង និងទឹកធ្លាក់ពីស្រុកបវិល ខេត្តបាត់ដំបង ក្រោយពេលបើកសំណង់បវិល និងសំណង់ព្រៃខ្ពស់។ បច្ចុប្បន្នកម្រិតទឹកស្ទឹងមង្គលបូរី បានឡើងដល់១៣ម៉ែត្រ២តឹក និងដងស្ទឹងសិរីសោភ័ណ ឡើងដល់៧ម៉ែត្រ២តឹកហើយ៕