ភ្នំពេញៈ យ៉ាងតិចណាស់ មានតារាចម្រៀងប្រុសស្រីល្បីឈ្មោះ ចំនួន៦៦នាក់ បានស្ម័គ្រចិត្តចូលរួមច្រៀង ដោយមិនគិតកម្រៃដើម្បីស្វែងរកថវិកាជួយដល់ប្រជាពលរដ្ឋកម្ពុជា ដែលកំពុងរងគ្រោះដោយទឹកជំនន់។ ការប្រគំតន្ត្រីលក់សំបុត្រក្នុងតម្លៃត្រឹម១ម៉ឺនរៀលនេះ នឹងធ្វើឡើងនៅថ្ងៃទី១១ ខែសីហា ឆ្នាំ២០១៨នេះ នៅភោជននីយដ្ឋានសេវេនប្រាយជិតផ្សារមាន់អាំង។ អាចចាត់ទុកថាជាព្រឹត្តិការណ៍ច្រៀងរាំ ទ្រង់ទ្រាយធំមួយ ដែលប្រមូលផ្តុំទៅដោយសិល្បករប្រុសស្រីល្បីឈ្មោះមកពីគ្រប់ផលិតកម្ម ក្នុងព្រឹត្តិការប្រគំតន្ត្រីមួយមានឈ្មោះថា "ការប្រគំតន្ត្រីចែករំលែកក្តីសង្ឃឹម"។

​លោក ឈួន សុខលីម អ្នកសម្របសម្រួលកម្មវិធីប្រគំតន្ត្រីខាងលើនេះបានបញ្ជាក់ថា ដោយសារតែសិល្បករជាច្រើនបានបង្ហាញក្តីអាណិត ចង់ចូលរួមរំលែកទុក្ខលើកទឹកចិត្តដល់ប្រជាជនខ្មែរដែលរងគ្រោះដោយទឹកជំនន់ទើបលោក និងពួកគាត់សម្រេចចិត្តរៀបចំព្រឹត្តិការណ៍មួយនេះឡើង។ លោកនៅចងចាំសម្តីតារាចម្រៀងខាត់ សុឃីមនិយាយថា "មិនចង់ឲ្យមហាជនយល់ថា អ្នកសិល្បៈស្រែករកតែជំនួយ ស្រែករកតែលុយពេលធ្លាក់ខ្លួនឈឺ ប៉ុន្តែពេលនេះសិល្បករចង់ស្រែករកជំនួយដែរ ប៉ុន្តែមិនមែនសម្រាប់ខ្លួនគាត់ទេ គឺចង់បានការជួយដល់សង្គមពិសេសពលរដ្ឋដែលកំពុងជួបការលំបាក"។ លោកបន្តទៀតថា សិល្បករទាំង៦៦នាក់ មិនត្រឹមតែចូលរួមច្រៀងដោយមិនគិតប្រាក់ទេ គឺថែមទាំងមានទឹកប្រាក់ផ្ទាល់ខ្លួន ដើម្បីបរិច្ចាកផងដែរ ហើយពួកគាត់និងជួយធ្វើការផ្សាយផ្ទាល់ (Live) តាមរយៈហ្វេសប៊ុកផ្ទាល់ខ្លួនដើម្បីស្វែងរកជំនួយ និងការលក់សំបុត្រ ដែលជំនួយមិនត្រឹមតែថវិកាទេគឺសូម្បីតែទឹកត្រីមួយដបក៏ពួកគាត់ប្តេជ្ញាថា នឹងទៅយកដើម្បីជួយដល់ពលរដ្ឋខ្វះខាតដែរ។ លោកថាសំបុត្រនឹងត្រូវប្រកាសលក់ក្នុងតម្លៃមួយម៉ឺនរៀលតាមរយៈសិល្បករ និងទីតាំងហាងមួយចំនួននៅភ្នំពេញ។ ​