សូមឲ្យសំណាងល្អ ពុកម៉ែបងប្អូន ទាំងអស់គ្នា!!! នេះបើគិតតាំងពីពាក់កណ្ដាលខែកក្កដា ឆ្នាំ២០១៨មក ប្រជាពលរដ្ឋជាង១ម៉ឺនគ្រួសារ ក្នុងខេត្តចំនួន៤ ត្រូវរងគ្រោះដោយសារទឹកជំនន់ជន់ លិចលំនៅដ្ឋាន
ភ្នំពេញៈ លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងកាលពីថ្ងៃម្សិលមិញថា គិតតាំងពីពាក់កណ្ដាលខែកក្កដា ឆ្នាំ២០១៨មក ប្រជាពលរដ្ឋចំនួន១១៩១៧គ្រួសារហើយ រស់នៅក្នុងខេត្ដ ចំនួន៤រួមមាន ខេត្ដស្ទឹងត្រែង ក្រចេះ ត្បូងឃ្មុំ និងកំពង់ចាម ត្រូវទឹកជំនន់ជន់លិចលំនៅដ្ឋាន។ ក្នុងនោះពលរដ្ឋចំនួន១៧៣៣គ្រួសារ ត្រូវបានជម្លៀសទៅទីទួលសុវត្ថិភាព
ស្ថិតក្នុងស្ថានភាពបែបនេះ ក្រសួងសុខាភិបាល បានផ្តល់មុងជ្រលក់ថ្នាំចំនួន៤ពាន់ រួមទាំងថ្នាំពេទ្យផង បញ្ជូនទៅដល់ទីដែលមានទឹកជន់លិចជាងគេ ក្នុងខេត្តស្ទឹងត្រែង។ ជាមួយគ្នាឯកឧត្តម ម៉ម ប៊ុនហេង ក៏បានក្រើនរំឭកដល់ប្រជាពលរដ្ឋ ត្រូវប្រុងប្រយ័ត្នខ្ពស់ ចំពោះសុវត្ថិភាពកុមារតូចៗ កុំឲ្យចុះងូតទឹក ឬហែលទឹកនៅពេលទឹកជំនន់ ពេលទឹកលិចត្រូវដាក់សញ្ញាសម្គាល់ ឬដាក់បន្លាស្រាស់នៅកន្លែងដែលមានរណ្ដៅ ឬស្រះ ហើយបន្ទាប់ពីទឹកជំនន់ ត្រូវសម្អាតគ្រប់ទីកន្លែងជុំវិញគេហដ្ឋានឲ្យមានអនាម័យល្អ ពិសេសអណ្ដូងទឹក ត្រូវតែស្ដារលាងសម្អាតចេញទាំងអស់។ សូមបញ្ចាក់ថា តាមការព្យាករណ៍របស់ក្រសួងធនធានទឹក នៅថ្ងៃទី០៣ ខែសីហា ឆ្នាំ២០១៨នេះ កម្ពស់ទឹកទន្លេមេគង្គខេត្តស្ទឹងត្រែង អាចនឹងចុះមកត្រឹម១០.៥៣ម៉ែត្រ ផុតកម្ពស់ឲ្យប្រុងប្រយ័ត្ន ខណៈទន្លេមេគង្គខេត្តក្រចេះនឹងចុះមកត្រឹម ២១.៦៥ម៉ែត្រ តែទន្លេមេគង្គខេត្តកំពង់ចាម នឹងឡើងដល់កម្ពស់ ១៥.១០ម៉ែត្រ៕
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។