ខេត្តព្រៃវែង ៖ បើគិតចាប់ពីថ្ងៃទី១ ខែសីហា ឆ្នាំ២០១៨ រហូតមកដល់ថ្ងៃទី៣ ខែសីហា ឆ្នាំ២០១៨ នេះកំពស់ទឹកទន្លេមេគង្គបានបន្តកើនឡើងជាបន្តបន្ទាប់ និងបានបង្កផលប៉ះពាល់ទៅលើស្រុកចំនួន២ក្នុងខេត្តព្រៃវែង គឺស្រុកពាមរក៌ និងស្រុកស៊ីធរកណ្តាល ។ យោងតាមរបាយការណ៌របស់គណៈកម្មការគ្រោះមហន្តរាយខេត្តព្រៃវែងបានឲ្យដឹងថា នៅស្រុកស៊ីធរកណ្តាលទឹកជំនន់បានជន់លិចប៉ះពាល់ដល់ឃុំចំនួន៤ក្នុងនោះឃុំព្រៃដើមថ្នឹងប៉ះពាល់ដំណាំស្រូវប្រជាពលរដ្ឋចំនួន៦០ហិកតា ឃុំព្នៅទី១ប៉ះពាល់ដំណាំស្រូវ និងចំការប្រជាពលរដ្ឋចំនួន១៦០ហិកតា ឃុំព្រែកចង្ក្រានប៉ះពាល់សាលារៀនមួយកន្លែង សិស្សតូចៗមួយចំនួនត្រូវបានផ្អាកការសិក្សា និងឃុំល្វេប៉ះពាល់ផ្លូវ១ខ្សែប្រវែង១៥០ម៉ែត្រ ។ ដោយឡែកសំរាប់ស្រុកពាមរក៌ទឹកបានជន់លិចឃុំចំនួន២ក្នុងនោះឃុំពាមមានជ័យប៉ះពាល់ចំនួន៥ភូមិ ទឹកលិចចូលក្រោមផ្ទះប្រជាពលរដ្ឋចំនួន៤១ខ្នង លិចផ្លូវប្រវែង១៥០០ម៉ែត្រ និងឃុំបន្លិចប្រាសាទប៉ះពាល់ភូមិចំនួន៦ភូមិ និងលិចផ្លូវប្រវែង៥០០០ម៉ែត្រ ។ ចំពោះករណីនេះដែរលោកស្រី សេង ទៀង អភិបាលស្រុកពាមរក៌បានបញ្ជាក់អោយដឹងថា គិតមកដល់ពេលនេះទឹកជំនន់មិនទាន់បង្កផលប៉ះពាល់ធ្ងន់ធ្ងរដល់បងប្អូនប្រជាពលរដ្ឋនៅឡើយទេ ប៉ុន្តែទោះជាយ៉ាងណាអាជ្ញាធរស្រុក និងខេត្តរួមទាំងគណៈកម្មការគ្រោះមហន្តរាយ កាកបាទក្រហម ព្រមទាំងកងកម្លាំងទាំងអស់បានត្រៀមខ្លួនរួចជាស្រេចហើយក្នុងការចុះជួយអន្តរាគមន៍ភ្លាមៗ បើសិនទឹកនៅតែបន្តកើនឡើង និងបង្កផលប៉ះពាល់ធ្ងន់ធ្ងរនោះ ។ សូមបញ្ជាក់ផងដែរថា គិតត្រឹមម៉ោង៦ព្រឹក ថ្ងៃទី៣ ខែសីហា ឆ្នាំ២០១៨ នេះកំពស់ទឹកទន្លេមេគង្គបានកើនឡើងដល់កំពស់៦.៥៦ម៉ែត្រហើយ ខណៈកំពស់ទឹកត្រូវប្រកាសអាសន្នត្រឹម៧ម៉ែត្រកន្លះ ៕
ប្រភព៖ Tep Monyrot