តាកែវៈ កាលពីព្រឹក​ថ្ងៃទី០៣ ខែសីហា ឆ្នាំ២០១៨ ដែលស្ថិតនៅចំណុចភូមិព្រៃស្លែង ឃុំកុមារាជា ស្រុកបាទី ខេត្តតាកែវ កម្លាំងអធិការដ្ឋាននគរបាលស្រុកបាទី ធ្វើការឃាត់ជនសង្ស័យម្នាក់ ក្នុងចំណោមបក្ខពួក២នាក់ មានឈ្មោះ សាន់ មុន្នីរក្សា ភេទប្រុស អាយុ១៨ឆ្នាំ មានទីលំនៅភូមិត្រាំខ្នា ឃុំសូភី ស្រុកបាទី ខេត្តតាកែវ ដោយជាប់ពាក់ព័ន្ធករណី ប្រើប្រាស់ដាវកាប់ប្លន់យកម៉ូតូ ពីជនរងគ្រោះម្នាក់ មានឈ្មោះរ៉េត គឹមជៀម ភេទប្រុស អាយុ២៧ឆ្នាំ មានទីលំនៅភូមិ១៤ សង្កាត់បឹងកក់១ ខ័ណ្ឌទួលគោក រាជធានីភ្នំពេញ។

តាមការសារភាពរបស់ ជនសង្ស័យបានឲ្យដឹងថា ដំបូងខ្លួនបាន ជិះម៉ូតូម៉ាក ហុងដាឌ្រីម សេ១២៥ ពណ៌ខ្មៅ សេរីឆ្នាំ២០១៧ ពាក់ស្លាក​លេខភ្នំពេញ 1GI-4975 ធ្វើសកម្មភាពប្រដាប់ដោយដាវ បានកាប់ប្លន់យកម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ សេរីឆ្នាំ២០១៨ ពាក់ស្លាកលេខភ្នំពេញ 1GS-7276 ពីបុរសម្នាក់នៅចំណុចភូមិផ្សារគុម្ភឫស្សី ឃុំតាំងដូង ស្រុកបាទី បានសំរេចរួចបើករត់គេចខ្លួន។ បច្ចុប្បន្នជនសង្ស័យនិងវត្ថុតាង ត្រូវបានកម្លាំងជំនាញ ធ្វើការសាកសួរដើម្បីកសាងសំណុំរឿង តាមនីតិវិធី ៕