ប្រធានគណបក្សខ្មែរក្រោក លោក សុខសុវណ្ណ វឌ្ឍនា សារពង្ស ហៅ វិល្លាម បានបង្ហោះសារថា នឹងរៀបចំពាក្យបណ្ដឹង ប្ដឹងលោកបណ្ឌិត សុខ ទូច ប្រធានរាជបណ្ឌិត្យសភា ចំពោះការគម្រាមចាប់អ្នកដឹកនាំយុទ្ធនាការស្នាមមេដៃមួយដេីម្បីកោះត្រល់ ។

លោកបានរៀបរាប់ថា៖ «គណបក្សខ្មែរក្រោក នឹងរៀបចំពាក្យបណ្ដឹង ប្ដឹងលោកបណ្ឌិតសុខទូច ប្រធានរាជបណ្ឌិត្យសភា ចូលអយ្យការក្រុងភ្នំពេញ ចំពោះការគម្រាមចាប់អ្នកដឹកនាំយុទ្ធនាការ ស្នាមមេដៃមួយដេីម្បីកោះត្រល់ បញ្ចូលគុក នេះជាភាពព្រហេីនមួយដែលប្រធានស្ថាប័នបណ្ឌិតនេះនិយាយហួសពីសមត្ថកិច្ចរបស់ខ្លួន រហូតហ៊ាននិយាយជួសរដ្ឋាភិបាល ហ៊ានគម្រាមស្ថាប័ននយោបាយស្របច្បាប់មួយដែលជាស្ថាប័នសាធារណៈ គណបក្សខ្មែរក្រោកមិនអាចទទួលយកបាន ខណៈដែលការដឹកនាំយុទ្ធនាការស្នាមមេដៃមួយដេីម្បីកោះត្រល់នេះ ជាបុព្វហេតុការពារប្រយោជន៍រួម ទាមទារប្រយោជន៍រួមសុទ្ធសាធ» ៕