ភ្នំពេញ៖ ម្ចាស់ជយលាភីក្នុងកម្មវិធី «The Voice Kid Cambodia» រដូវកាលទី១ គឺ តារាចម្រៀង ពេជ្រ ថៃ បច្ចុប្បន្នកំពុងមានទុក្ខជាទម្ងន់ ខណៈលោកយាយជាទីស្រឡាញ់ ដែលពេជ្រ ថៃ តែងតែហៅថា «ម៉ែចាស់» នោះ បានទទួលមរណភាពកាល ពីយប់ថ្ងៃទី ០៦ ខែសីហា ឆ្នាំ២០១៨។ ជាមួយនឹងទុក្ខសោកបាត់បង់ជីដូន ដែលធ្លាប់ចិញ្ចឹមបីបាច់តាំងពីតូចក្រូចឆ្មា រហូតដល់ធំនោះ គឺមានទស្សនិកជនជាច្រើន បានជួយរំលែកទុក្ខដល់ ពេជ្រ ថៃ ខណៈតារាចម្រៀងវ័យក្មេងរូបនេះ ហាក់ធ្វើឱ្យអ្នកក្នុងចង្កោមសិល្បៈ ក៏ដូចជាមហាជនមានការអាណិតអាសូរ ចំពោះរូបគេគ្រប់គ្នា ចាប់តាំងពីចូលប្រឡងក្នុងក្នុងកម្មវិធី «The Voice Kid Cambodia» មកម្លេះ។

អ្វីដែលធ្វើឲ្យប្រិយមិត្ត ខ្លោចចិត្តអាណិតប្អូនជាងនេះទៀតនោះ ម៉ែចាស់ទើបតេែស្លាប់កាលពីយប់មិញ ដោយបន្សល់តែភាពស្រណោះសោកស្តាយរកអ្វីមកប្រៀបពុំបាន។ ជាក់ស្ដែងបើតាមគណនីហ្វេសប៊ុករបស់ ពេជ្រ ថៃ បានពោលថា៖ «មរណៈភាពរបស់លោកយាយគឺជាទុក្ខដ៏ធំមហិមារបស់ចៅ ចៅសូមបួងសួងដល់អារុក្ខអារក្សអ្នកតា វត្ថុស័ក្តិសិទ្ធ ក្នុងលោក សូមកើតជាចៅរបស់លោកយាយគ្រប់ៗជាតិ»។ តាមពាក្យពេចន៍ដ៏គួរឲ្យស្រណោះស្រណោកនេះ បានធ្វើឲ្យមហាជននាំគ្នាសម្ដែងការអាណិតអាសូរ និងជួយលួងលោមកុមារីរូបនេះឲ្យមានកម្លាំងចិត្តឡើងវិញផងដែរ៕