ថៃៈ កាលពីថ្ងៃព្រហស្បតិ៍ ទី៩ ខែសីហា ឆ្នាំ២០១៨ តុលាការបានកាត់ទោសអតីតសង្ឃ អាប់យសម្នាក់ អោយជាប់គុកដល់ទៅ១១៤ឆ្នាំ នៅជាងមួយឆ្នាំ បន្ទាប់ពីសង្ឃឡូយឆាយរូបនេះ ត្រូវបានចាប់បញ្ជូនមកពីសហរដ្ឋអាមេរិក។ វីរ៉ាផន ស៊ុកផន (Wiraphon Sukphon) បានធ្វើអោយសារព័ត៌មានចុះផ្សាយ ព្រោងព្រាតនៅឆ្នាំ២០១៣ ក្រោយរូបភាពរបស់គាត់ពាក់វែនតាខ្មៅ ជាមួយនឹងការបូបប្រ៊ែន Louis Vuitton កំពុងជិះក្នុងយន្តហោះឯកជនមួយ។ អតីតសង្ឃវ័យ៣៩ឆ្នាំនេះ បានភៀសខ្លួនទៅអាមេរិក តែត្រូវបានអាជ្ញាធរ អាមេរិកបញ្ជូនមកថៃវិញ ក្រោយពីត្រូវបានចោទប្រកាន់ថា ចាំរំលោភក្មេងស្រីម្នាក់ និងបោកប្រាស់កឹបកេងប្រាក់ដែលពុទ្ធបរិស័ទផ្តល់សំរាប់សាងសង់ព្រះពុទ្ធរូប។ ការស៊ើបអង្កេតបន្ថែមបង្ហាញថា បុរសនេះមានរថយន្តប្រណិតជាច្រើន និងគណនីធនាគាររាប់ភ្លេច តំលៃសរុប៧០០.០០០ដុល្លារ។

Wiraphon ត្រូវបានដាក់ទោសចំពោះការលាងលុយ ឆបោកនិងរំលោភច្បាប់ ពីស្តីបទឧក្រិដ្ឋ កុំព្យូទ័រ ដោយសារបានធ្វើការរៃអង្គាសបច្ច័យតាមអនឡាញ នេះបើតាមមន្រ្តីតុលាការម្នាក់ ប្រាប់ទីភ្នាក់ងារសារព័ត៌មានបារាំង។ មន្រ្តីរូបនេះបាននិយាយថា ចៅក្រមបានដាក់ទោសគាត់អោយជាប់គុកសរុប១១៤ឆ្នាំ។ Wiraphon ក៏ត្រូវតុលាការតំរូវអោយប្រគល់ប្រាក់២៨.៦លានបាត ទៅអោយម្ចាស់ជំនួយ២៩នាក់ ដែលបានដាក់ពាក្យប្តឹង។ ការកាត់ក្តីរឿងចាប់រំលោភត្រូវរំពឹងថា នឹងធ្វើឡើងនៅខែតុលា។ អតីតសង្ឃរូបនេះជាប់ចោទពីបទរួមភេទ ជាមួយក្មេងស្រីអនីតិជន កាលពីជាងដប់ឆ្នាំមុន និងអាចជាប់គុក២០ឆ្នាំ បន្ថែម បើសិនជាត្រូវដាក់ទោស។ ថៃជាប្រទេសមានអ្នកកាន់សាសនាព្រះពុទ្ធ ភាគច្រើនតែរឿងអាស្រូវរបស់សង្ឃ ជាបន្តបន្ទាប់បានធ្វើអោយសាធារណជនភ្ញាក់ផ្អើល និងអស់ជំនឿ។ កាលពីខែឧសភា ចៅអធិការវត្ត (ភ្នំមាស) នៅក្រុងបាងកក បានប្រគល់ខ្លួនឲ្យប៉ូលិស ក្រោយពីប្រាក់ប្រមាណ៤លានដុល្លារ ត្រូវបានរកឃើញនៅក្នុងគណនីធនាគារ ដែលដាក់ឈ្មោះរបស់គាត់។ នៅក្នុងករណីធំមួយពាក់ព័ន្ធនឹងព្រះពុទ្ធសាសនាថៃ កាលពីខែកុម្ភៈឆ្នាំមុន ទាហានបានឡោមព័ទ្ធវត្តល្បីឈ្មោះមួយ នៅជាយក្រុងបាងកក អស់ពេលរាប់សប្តាហ៍ ដើម្បីតាមស្វែងរក និងចាប់ខ្លួនចៅអធិការវត្ត មានបញ្ហាឆបោកដ៏ធំ តែមកទល់សព្វថ្ងៃនៅគេមិនទាន់ចាប់ខ្លួនសង្ឃអង្គនេះបាននៅឡើយទេ៕ ប្រភពៈ rasmeinews