ថៃ៖ តារាសម្តែងដ៏ល្បីឈ្មោះមួយរូប ត្រូវបានសមត្ថកិច្ចធ្វើការឃាត់ខ្លួន ក្រោយរកឃើញថា មានពាក់ព័ន្ធនឹងការបោកលុយតាម Bitcoin ជិត១០០០លានបាត។ តារាសម្តែងដែលមានឈ្មោះថា Jiratpisit Jaravijit ហៅ(Boom)អាយុ២៧ឆ្នាំ ដែលទទួលបានភាពល្បីល្បាញយ៉ាងខ្លាំងតាមរយៈរឿងភាគទូរទស្សន៍ "Bad Romance The Series" ដែលមានចំណងជើងថា​"Nang Ai" និង"Naew Sutthai" នោះ ត្រូវបានគេរាយការណ៍ថា បានផ្សំគំនិតគ្នាជាមួយគ្នា៦នាក់ផ្សេងទៀត ដើម្បីបោកប្រាស់ជនបរទេសម្នាក់រស់នៅប្រទេសហ្វាំងឡង់ ឲ្យដាក់ប្រាក់ចំនួន៧៨៧ លាន​បាត (ជាង ២៤ លាន​ដុល្លារ) ទៅ​ក្នុង Bitcoin ដោយ​សន្យា​ថា​នឹង​ចាប់​ផ្ដើម​ជំនួញ​លើ Bitcoin នេះ​ជាមួយ​គ្នា។ ជនរងគ្រោះមានឈ្មោះថា Aarni Otava Saarimaa អាយុ ២២​ឆ្នាំ​ បានដាក់ពាក្យបណ្តឹងទៅកាន់អាជ្ងាធរ ប្រទេសថៃកាលពីថ្ងៃទី៣០ ខែមករា រយៈពេល៦ខែក្រោយ លោកធ្វើកិច្ចសន្យាជាមួយនឹងតារាសម្តែងJiratpisit និង​បក្សពួក​របស់​លោក​។ ក្រោយពីធ្វើការស៊ើប​អង្កេត​រួច​មក ខាងប៉ូលីសបានចុះធ្វើការឃាត់ខ្លួនតារាប្រុសរូបនេះភ្លាមៗ អំឡុងពេលកំពុងថត រួមនឹងបងប្អូនគេចំនួន២នាក់ ដែលជាជនសង្ស័យ។ ជនសង្ស័យចំនួន៤នាក់ ទៀត ត្រូវបានឲ្យដឹងថា ជាសសហគ្រិន​នៅ​ឯ​ទីផ្សារ​ភាគហ៊ុន​របស់​ប្រទេស​ថៃ។ បើ​តាម​ប៉ូលិស​បាន​បញ្ជាក់​ដែរថា ជន​សង្ស័យ​ខ្លះ បច្ចុប្បន្ន​មិន​បាន​នៅ​ក្នុង​ប្រទេស​ថៃ​នោះ​ទេ។ ជាមួយគ្នានេះ ប៉ូលីសក៏បានអះអាងថា​ បងប្អូនរបស់តារាប្រុសរូបនេះជាប់ចោទ មានដីជាច្រើនប្លង់សរុបជាទឹកប្រាក់ជាង​៦លានដុល្លាអាមេរិក ក៏ត្រូវបានសង្ស័យថាជាដីដែលបានមកពីការឆបោកនេះផងដែរ។ យ៉ាងណាមិញ ខណៈនេះ Jiratpisit “Boom” Jaravijit ធានាខ្លួនឲ្យនៅក្រៅឃុំជាបណ្តោះអាសន្ន ដោយតម្រូវឲ្យបង់ប្រាក់ជាង ៦ម៉ឺនដុល្លារ និងកំពុងរង់ចាំការកាត់ក្ដី។ គួរបញ្ជាក់ផងដែរថា តារា​សម្ដែង​ Jiratpisit ត្រូវបានប៉ូលីសឃាត់ខ្លួន​កាល​ពី​ថ្ងៃ​ព្រហស្បតិ៍ នៅ​ឯ​ផ្សារ​ទំនើប Major Cineplex Ratchayothin ក្នុង​ទីក្រុង​បាង​កក៕ ​