សូមបងប្អូន ប្រុងប្រយ័ត្នឲ្យបានខ្ពស់ នៅរថយន្តកែឆ្នៃ!!! ឆេះរថយន្តកាមរី កែច្នៃទ្រុង១គ្រឿង មូលហេតុមកពីដាច់ខ្សែពាន បណ្ដាលឲ្យឆ្លងចរន្តភ្លើង

បន្ទាយមានជ័យៈ កាលពីរសៀលថ្ងៃទី១៤ ខែសីហា ឆ្នាំ២០១៨ នៅចំណុចភូមិរោងគោកណ្តាល ឃុំចំណោម ស្រុកមង្គលបូរី ខេត្តបន្ទាយមានជ័យ។ មានករណីរថយន្តកាមរី ពណ៌ស កែច្នៃទ្រុង១គ្រឿង ពាក់ស្លាកលេខ ៣៤២០ ភព២ បានធ្វើដំណើរពីទិសខាងត្បូងទៅជើង។ លុះមកដល់កន្លែងកើតហេតុ ស្រាប់តែរថយន្តមានបញ្ហាចាប់ផ្តើមដាច់ខ្សែពាន ផ្ទុះធុងទឹក ឆ្លងចរន្តភ្លើង ចេញពីផ្នែកខាងមុខរថយន្ត បង្កឲ្យមានការភ្ញាក់នាំគ្នារត់ចេញស្រែកឲ្យអ្នកភូមិជួយ។ ខណៈដែលរថយន្តនោះ ធ្វើដំណើរលើកំណាត់ផ្លូវជាតិលេខ ១៥៩C ដឹកសាច់ញាតិ ចេញពីស្រុកភ្នំព្រឹក ខេត្តបាត់ដំបង មកស្រុកមង្គលបូរី ខេត្តបន្ទាយមានជ័យ ដើម្បីសាកសួរសុខទុក្ខបងប្អូន ដេកសម្រាកព្យាបាលជម្ងឺ ក្នុងពេទ្យមិត្តភាព កម្ពុជា.ជប៉ុន ស្រុកមង្គលបូរី។

អ្នកបើករថយន្តខាងលើមានឈ្មោះ មក់ ចន្ថា ភេទប្រុស អាយុ២៩ឆ្នាំ រស់នៅភូមិចំការស្រូវ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង។ នៅក្នុងហេតុការណ៏នេះ មិនបង្កប៉ះពាល់រងគ្រោះ ដល់អ្នកធ្វើដំណើរនោះឡើយ៕