ភ្នំពេញៈ កាលពីវេលាម៉ោង៩យប់ ថ្ងៃទី១៤ ខែសីហា ឆ្នាំ២០១៨ ជនជាតិបរទេសប្រុសស្រី៤នាក់ ជិះម៉ូតូកង់បីឥណ្ឌាមួយគ្រឿង តាមបណ្តោយផ្លូវសហពន្ធ័រុស្ស៊ី ស្ថិតនៅចំណុចមុខសាលកវិទ្យាល័យភូមិន្ទភ្នំពេញ ក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ ត្រូវជនសង្ស័យមួយក្រុម ធ្វើសកម្មភាពឆក់កាបូបពីនារីម្នាក់បានសម្រេចរួចគេចខ្លួនបាត់ស្រមោល។ ចំណែកនារីរងគ្រោះមិនបានស្គាល់អត្តសញ្ញាណនោះទេ។

តាមប្រភពពីម្ចាស់ម៉ូតូកង់បី បានឲ្យដឹងថា មុនកើតហេតុរូបគេបានដឹកភ្ញៀវជនជាតិបរទេសប្រុសស្រី៤នាក់ចេញពីសណ្ឋាគារមួយកន្លែង នៅម្តុំបាត់ទន្លេ បំណងដឹកយកទៅដាក់ នៅអាកាសយានដ្ឋានអន្តរជាតិ ភ្នំពេញ បានធ្វើដំណើរតាមបណ្តោយផ្លូវសហពន្ធ័រុស្ស៊ី ទិសដៅពីកើតទៅលិច លុះមកដល់ចំណុចកើតហេតុខាងលើស្រាប់តែលេចមុខជនសង្ស័យ២នាក់ ជិះម៉ូតូមួយគ្រឿង មិនចាំម៉ាកមកពីក្រោយ រួចធ្វើសកម្មភាពឆក់កាបូបស្ពាយពីនារីម្នាក់ ក្នុងចំណោម៤នាក់ ដាក់នៅក្នុងកង់បីបានសម្រចរួចនាំគ្នាជិះម៉ូតូគេចខ្លួនដោយសុវត្ថិភាព។ គួរបញ្ជាក់ផងដែរ ទ្រព្យសម្បត្តិដែលត្រូវបាត់បង់នៅក្នុងកាបូបជនរងគ្រោះ រួមមានទូរសព្ទដៃ១គ្រឿងមិនចាំម៉ាក និងប៉ាស្ព័រ១ក្បាល ៕