ភ្នំពេញ ៖ មានករណីគ្រោះថ្នាក់ចរាចរណ៍មួយបានកើតឡើងនៅវេលាម៉ោង១១ និង១០នាទីយប់ ថ្ងៃទី២១ ខែសីហា ឆ្នាំ២០១៨ ដែលបង្កឡើងដោយរថយន្តស៊េរីទំនើបមួយគ្រឿងម៉ាក BMW បានមកបុកបង្គោលភ្លើងនៅក្បែទីស្ដីការគណៈរដ្ឋមន្ត្រី ដែលស្ថិតនៅតាមបណ្ដោយផ្លូវសហព័ន្ធរុស្សុី កែងផ្លូវលេខ១០៩ ក្នុងសង្កាត់មនោរម្យ ខណ្ឌ៧កមរា រាជធានីភ្នំពេញ បណ្ដាលឲ្យរថយន្តបង្ករងការខូចខាតផ្នែកខាងមុខយ៉ាងដំណំ ។

យោងតាមប្រភព័ត៌មានពីកន្លែងកើតហេតុ បានឲ្យដឹងថា នៅពេលកើតហេតុនោះ គឺមានគេឃើញរថយន្តមួយគ្រឿងម៉ាក BMW ពណ៌ស គ្មានស្លាកលេខ បានធ្វើដំណើរតាមបណ្ដោយផ្លូវសហព័ន្ធរុស្សុី ទិសដៅពីលិចមកកើត ក្នុងលឿនយ៉ាងលឿន ខណះមកដល់ចំណុចកើតហេតុមិនប្រយ័ត្ន ស្រាប់តែអ្នកបើកបរបួងចង្កូតបត់ឆ្វេងលឿនពេក និងមិនប្រយ័ត្ន ក៏ជ្រុលទៅបុកបង្គោលភ្លើងយ៉ាងពេញទំហឹង បណ្ដាលឲ្យរថយន្តរងការខូចខាតផ្នែកខាងមុខយ៉ាងដំណំ សំណាងល្អមិនបង្កគ្រោះថ្នាក់ដល់អ្នកបើកបរ និងប្រជាពលរដ្ឋកំពុងធ្វើដំណើរ ។ ក្រោយកើតហេតុ អ្នកបើករថយន្តបង្កបានចុះគេចខ្លួនបាត់ ។ ចំណែកឯសមត្ថកិច្ចមូលដ្ឋានបានចុះមកដល់កន្លែងកើតហេតុ ហើយទាក់ទងទៅសមត្ថកិច្ចជំនាញចរាចរណ៍ឲ្យមកធ្វើការវាស់វែង ស្ទួចយករថយន្តបង្កខាងលើ ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរងចាំម្ចាស់ចូលខ្លួនដោះស្រាយតាមផ្លូវច្បាប់ ៕