បួនចំណុចធានាថាមុនអាយុ៣០ឆ្នាំ នឹងសល់លុយហើយអាចបើកអាជីវកម្មផ្ទាល់ខ្លួនបាន 1. ចំណាយចាំបាច់ 2. ចំណាយត្រូវតាមខ្ទង 3. បើកគណនីសន្សំ 4. វិនិយោគលើខ្លួនអ្នកផ្ទាល់

យុវវ័យជាច្រើនចាប់ពីអាយុ១៨ឆ្នាំឡើងទៅប្រាកដណាស់ចង់ទទួលបានភាពជោគជ័យដោយពុំចាំបាច់ពឹងពាក់លើសាច់ញាតិ ឬមិត្តភ័ក្ត្រ ប៉ុន្តែពួកគាត់ពុំទាន់បានយល់ដឹងពីយុទ្ធវិធី ដើម្បីសន្សំទ្រព្យ សម្រាប់ធ្វើការវិនិយោគនៅពេលខាងមុខ ហើយអ្នករាល់គ្នាក៏តែងតែលួចសួរខ្លួនឯងថា រាល់ថ្ងៃខិតខំប្រឹងប្រែងធ្វើការសឹងតែអស់ពីកម្លាំងកាយចិត្តចុះហេតុអ្វីនៅតែពុំទទួលបានភាពជោគជ័យសម្រាប់ជីវិតចឹង ខំប្រឹងធ្វើការណាស់តែលទ្ធផលដែលទទួលបានមកវិញមានតែការសរសើរ និងពាក្យស្ដីបន្ទោសពីថ្នាក់លើស្ទើរតែរាល់ថ្ងៃ។ តើភាពជោគជ័យនៅឯណា? តាមពិតភាពជោគជ័យតែងតែនៅក្បែរអ្នកជានិច្ច លុះត្រាតែអ្នកដាក់ចិត្តដាក់កាយព្រមទទួលយកវា ទើបជីវិតរបស់អ្នកមានការផ្លាស់ប្ដូរ។ សាកល្បងនូវវិធីសាស្រ្ដទាំងបួនខាងក្រោមនេះ ធានាថាមុនអាយុ៣០ឆ្នាំអ្នកនិងអាចមានអ្វីៗស្ទើរគ្រប់យ៉ាងដែលអ្នកត្រូវការ។ 1. ចំណាយចាំបាច់៖ ពិតណាស់រាល់ថ្ងៃអ្នកគ្រប់គា្នតែងតែចាយវាយជាប្រចាំ ពេលខ្លះចាយដោយមិនដឹងខ្លួនក៏មានដែរ ព្រោះដោយសារតែចំណង់ ឬដើម្បីតែភាពហឺហាតាមតែការអូសទាញរបស់មិត្តភ័ក្ត្រ ឬអ្នកជុំវិញខ្លួន។ តាមពិតទៅការចាយវាយអ្នកត្រូវតែធ្វើ តែមិនត្រូវធ្វើវាអោយហួសក្បួនខ្នាតនោះទេ ចំណាយមានច្រើនប្រភេទណាស់សួរថាតើអ្នកអាចមានលទ្ធភាពចាយ ឬទិញយករបស់របរទាំងអស់នោះមកទាំងព្រមនៅពេលដែលបើកប្រាក់ខែតែម្ដងបានដែរឬទេ ចម្លើយគឺមិនអាចនោះទេ។ មុននិងអ្នកសម្រេចចិត្តថាចង់បានរបស់នោះមកអ្នកត្រូវតែរំលឹកខ្លួនឯងជានិច្ចថា តើខ្ញុំត្រូវការវាជាចាំបាច់ដោយខ្វះមិនបានមែនទេ? តើវានឹងផ្ដល់អត្ថប្រយោជន៍អ្វីខ្លះពេលខ្ញុំទទួលបានវាមក? តើអាចមាន ទំនិញជំនួសដែលមានតម្លៃធូរថ្លៃឬសមរម្យដែរ ឬទេ? បីសំនួរនេះអាចធ្វើអោយអ្នកភ្ងាក់ខ្លួនព្រឺត មុននិងសម្រេចចិត្តថាចង់បានអ្វីមួយ ហើយអាចអោយអ្នកកាត់បន្ថយចំណាយបានយ៉ាងច្រើន បើធ្វើការចំណាយក៏ត្រូវទៅតាមខ្ទង់នៃចំណូលរបស់អ្នកផងដែរ។ 2. ចំណាយត្រូវតាមខ្ទង៖ ភាគច្រើននៃបុគ្គលម្នាក់ៗបានរអូររទាំថា ទើបតែបើកប្រាក់ខែសោះជិតអស់លុយទៀតហើយ បញ្ហាទាំងនេះមកពីអ្នកចាយវាយមិនត្រូវទៅតាមខ្ទងចំណូលរបស់អ្នក <ចំណាយកើនឡើងលើសពីចំណូល នោះបំណុលក៏មានការកើនឡើងផងដែរ >។ ចំណុចនេះមុននឹងអ្នកទិញយករបស់នោះមកប្រើប្រាស់អ្នកត្រូវគិតដល់ប្រភពចំណូលចរន្តរបស់អ្នកជាមុនសិន ហើយបន្ទាប់មកទៀតអ្នកត្រូវតែលើកឡើងសំនួរសួរថា តើវាបំណុល ឬជាទ្រព្យ? តើខ្ញុំអាចទទួលបានអត្ថប្រយោជន៍សេដ្ឋកិច្ចពីវានៅពេលខាងមុខបានដែរ ឬទេ? តើសមតុល្យសាច់ប្រាក់អាចគ្រប់គ្រងលើវាបានអត់? សាកល្បងគិតហើយគិតទៀត។ 3. បើកគណនីសន្សំ៖ ការសន្សំដាច់ខាតអ្នកត្រូវតែធ្វើអោយបានដើម្បីសម្រេចដល់គោលដៅរបស់អ្នកនាពេលខាងមុខ។ គណនីសន្សំជាធម្មតាអ្នកត្រូវដកចេញ ៣០ភាគរយពីចំណូលប្រចាំខែរបស់អ្នក។ វិធីសន្សំដែលទទួលបានប្រសិទ្ធិភាពខ្ពស់អ្នកត្រូវតែបង្កើតគណនីផ្ទាល់ខ្លួនជាមួយនឹងគ្រឹះស្ថានមីក្រូហិរញ្ញវត្ថុ ឬធានាគារណាមួយដែលអ្នកធ្លាប់បានស្គាល់ពីមុនមក ការដាក់សន្សំបែបនេះអាចមានសុវត្តិភាព ហើយទទួលផលចំណេញបានច្រើនផងដែរ ទាំងប្រាក់ដើម និងការប្រាក់ជាប្រចាំ។ 4. វិនិយោគលើខ្លួនអ្នកផ្ទាល់៖ ចំណេះដឹងគឺជាទ្រព្យគាប់ប្រសើរដែលស្ថិតស្ថេរជារាងរហូត ប្រើប្រាស់ច្រើនកាលណានិងទទួលបានផ្លែរផ្ការលើសពិការគិតរបស់អ្នក។ ការវិនិយោគ គឺជាការបណ្ដាក់ទុនពេលបច្ចប្បន្ន ហើយនឹងទទួលបានផលចំណេញនាពេលខាងមុខស្របតាមការរំពឹងទុក។ ដូចគ្នានេះដែរ ការវិនិយោគចំពោះខ្លួនឯងផ្ទាល់ គឺនឹងទទួលបានផលចំណេញ ដោយមិនអាចខាតបង់បានឡើយនាពេលខាងមុខ។ ការវិនិយោគសំដៅដល់ការសិក្សារចំណេះ ឬជំនាញតែម្ដង។ អ្នកត្រូវតែដកចេញពីប្រាក់ចំណូលសរុបប្រចាំខែរបស់អ្នកប្រហែលពី ១០ ទៅ ២០ ភាគរយសម្រាប់យកមកវិនិយោគលើខ្លួនអ្នក ធ្វើបែបនេះអ្នកនឹងទទួលបានតម្លៃតបស្នងពីការចំណាយលើការវិនិយោគនេះបានល្អគាប់ប្រសើរ ហើយចំណេះ ឬជំនាញទាំងអស់នោះវានឹងជួយដល់អ្នកសម្រាប់ដោះស្រាយបញ្ហាផ្សេងនាពេលខាងមុខតទៅទៀត៕