ភ្នំពេញ៖ មានករណីចោរឆក់កាបូបពីស្រ្តីម្នាក់បានសម្រេច ហើយស្រ្តីរូបនោះបានធ្លាក់ពីលើរឺុម៉កម៉ូតូ បោកក្បាលនឹងថ្នល់បណ្តាលឲ្យរងរបួសយ៉ាងធ្ងន់ធ្ងរ កាលពីថ្ងៃទី២០ ខែសីហា ឆ្នាំ២០១៨ វេលាម៉ោង១១ និង១០នាទីព្រឹក ស្ថិតនៅចំណុចមុខហាងលក់បាយសុខហុកផ្លូវ១០១៩(ហាណូយ) ភូមិពោងពាយ សង្កាត់ភ្នំពេញថ្មី ខណ្ឌសែនសុខ ដោយគ្មានរំខានសមត្ថកិច្ចអីបន្តិចសោះ។

ស្រ្តីរងគ្រោះមានឈ្មោះថា ប៉ុល សារ៉ាម អាយុ ៤៥ឆ្នាំភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើតភូមិសង្កែចុង ឃុំក្រាំងស្វាយ ស្រុកព្រះស្តេច ខេត្តព្រៃវែង ។ បើតាមការឲ្យដឹងពីប្អូនថ្លៃជនរងគ្រោះបានប្រាប់ឲ្យដឹងថា ស្រ្តីរងគ្រោះចេញពីផ្ទះ បំណងទៅយកត្រីនៅព្រែកព្មៅ ដោយជិះម៉ូតូអូសរ៉ឺម៉ក ខណៈពេលកំពុងតែជិះដល់មុខហាងលក់បាយសុខហុក ស្រាប់តែមានជនសង្ស័យម្នាក់ជិះម៉ូតូឌូក(ម៉ូតូធំ)មកពីក្រោយឆក់យកកាបូបលុយដែលគាត់វ៉ាត់ និង ចង្កេះពីជនរងគ្រោះ ដោយនៅក្នុងកាបូបនោះមានលុយជិត២លានរៀល បណ្តាលឲ្យគាត់ធ្លាក់ពីលើរ៉ឺម៉ករងរបួសធ្ងន់ចំណែកជនសង្ស័យគេចខ្លួនបាត់ ។ បច្ចុប្បន្នជនរងគ្រោះត្រូវបានដឹកទៅសង្រ្គោះបន្ទាន់ នៅមន្ទីរពេទ្យហើយ។ ដោយ៖ និស្ស័យ