កាលពីថ្ងៃម្សិលមិញ ថ្ងៃទី២៣ ខែសីហា ឆ្នាំ២០១៨ វេលាម៉ោង១១ៈ៤៨នាទីព្រឹក មានករណីប្លន់ដ៏កក្រើកមួយ នៅរាជធានីភ្នំពេញ ដោយក្រុមចោរប្រដាប់ទៅដោយអាវុធខ្លី ២ដើម បានចូលប្លន់ធនាគារ អ អេច ប៊ី ឥណ្ឌូឆាយណា (RHB) ទាំងកណ្ដាលថ្ងៃត្រង់ ដែលមានទីតាំងនៅវិទ្យាស្ថាន វណ្ណ ដា តាមបណ្តោយផ្លូវម៉ៅសេទុង ដោយក្រុមចោរមានគ្នា ៥នាក់ ជិះម៉ូតូ២គ្រឿង ប្លន់ប្រមូលយកលុយអស់ជាង ១០ម៉ឺនដុល្លារ ហើយក៏រត់គេចទៅដោយសុវត្តិភាព។

ក្រោយកើតហេតុភ្លាមៗ សមត្តកិច្ចបានធ្វើការឃាត់ខ្លួនជនសង្ស័យម្នាក់ ភេទប្រុស ដែលគេសង្ស័យថា អាចជាបក្សពួករបស់ក្រុមចោរខាងលើ ហើយបាននាំយកទៅសាកសួរអស់ជាច្រើនម៉ោង ទើបដឹងថាយុវជនរូបនេះមិនបានពាក់ព័ន្ធ និងករណីប្លន់នេះឡើយ ហើយក៏ដោះលែងឲ្យមកផ្ទះវិញ។ ទាក់ទងនឹងករណីប្លន់ខាងលើនេះដែរ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា មីក្រូហិរញ្ញវត្ថុឯកជនទាំងអស់ ត្រូវ​ចេះរកវិធីការពារទ្រព្យសម្បត្តិរបស់ខ្លួន និងរបស់អតិថិជនដែលបានផ្ញើ ដោយថាមិនចាំបាច់មានការណែនាំពីស្ថាប័នពាក់ព័ន្ធរបស់រដ្ឋនោះទេ។ នាយឧត្តមសេនីយ៍ ខៀវ សុភ័គ សង្កត់ន័យធ្ងន់ៗទៀតថា ស្ថាប័នឯកជនគួរតែគិតគូរខ្លួនឯង ទ្រព្យសម្បត្តិខ្លួនឯង គិតគូរខ្លួនឯងទៅ ចាំបាច់គេណែនាំ។ ផ្ទះយើងដេកមិនយាម ចោរចូលលួចមាន់ស៊ីអស់ឥឡូវហើយ។ ចំណែកឯ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បាន​បើកកិច្ចប្រជុំបន្ទាន់ជាមួយនាយកឧត្តមសេនីយ៍​ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ មេបញ្ជាការរងកងរាជអាវុធហត្ថរាជធានី និងអភិបាលខណ្ឌទាំង១២ ដើម្បី​បានប្រាប់ទៅ​សមត្ថកិច្ចទាំងអស់​​មិនត្រូវបន្ទោសគ្នាទៅវិញមក ឬដាក់បន្ទុកលើកស្ថាប័នណាមួយនោះទេ ប៉ុន្តែត្រូ​វរួមសហការគ្នា ការពារសន្តិសុខ សុវត្ថិភាពជូនប្រជាពលរដ្ឋ អាជីវករ ដែលប្រកបអាជីវកម្ម ក្នុងរាជធានីភ្នំពេញ ៕