ភ្នំពេញៈ តារាចម្រៀងវ័យក្មេង ម្ចាស់បទ "គ្រាស្នេហ៍" ដែលទទួលបានការគាំទ្រយ៉ាងខ្លាំង ពីយុវវ័យកន្លងមកទើបនឹងបញ្ចេញបទចម្រៀង Original Song ថ្មីទី៧របស់ខ្លួន កាលពីចុងសប្តាហ៍នេះ។ បទថ្មីនេះគឺបទ "មនុស្សទីបី" ដែលចេញមិនបានប៉ុន្មានម៉ោងផង ក៏ទទួលបានការគាំទ្រច្រើនមិននឹកស្មានដល់។ ​

ថៃ អតិជាតិបុត្រ តារាចម្រៀងប្រចាំផលិតកម្ម VCine Picture ធ្លាប់ផ្ទុះការគាំទ្រខ្លាំង លើបទចម្រៀងមួយចំនួន ដែលបទចម្រៀងខ្លះមានការចូលទស្សនាមិនក្រោមជាង១០លានដងនោះទេ។ តារាចម្រៀងវ័យក្មេងរូបនេះ ក៏កំពុងទទួលបានការគាំទ្របន្ថែមទៀត ជាមួយនឹងស្នាដៃសិល្បៈផ្នែកចម្រៀងថ្មីជាមួយនឹងការរៀបចំខ្លួនថ្មីប្លែកខុសពីសិល្បករដទៃ។ បទថ្មី "មនុស្សទីបី" ប្រកាសចេញភ្លាម មានក្រុមយុវវ័យជាច្រើនបានចាប់អារម្មណ៍ខ្លាំង ដែលអត្ថន័យនៃបទចម្រៀងនេះ បានចាក់ចំបេះដូងអ្នកគាំទ្រ និងរឿងរ៉ាវស្នេហារបស់ពួកគេ។ តារាចម្រៀងវ័យក្មេងរូបនេះបានបញ្ជាក់ថា លោកសប្បាយចិត្ត ដែលស្នាដៃបទចម្រៀងថ្មី ដែលលោក និពន្ធបទភ្លេង ទំនុកច្រៀង និងច្រៀងដោយខ្លួនឯងបានចេញជារូបរាងឡើងហើយ ក៏ទទួលបានការចាប់អារម្មណ៍ខ្លាំងពីទស្សនិកជន។ លោកបញ្ជាក់ថា នេះគឺជាកម្លាំងចិត្តដ៏ធំធេងសម្រាប់លោក បន្តការប្រឹងប្រែងបន្ថែមទៀត លើការងារសិល្បៈ។ លោកថាស្នាដៃថ្មីរបស់លោក នឹងបន្តលេចចេញជារូបរាងជាបន្តបន្ទាប់ ក្នុងពេលខាងមុខផងដែរ។ គួរបញ្ជាក់ដែរថា ថៃ អតិជាតិបុត្រ ទើបនឹងប្រឡូកក្នុងវិស័យចម្រៀង ត្រឹមតែរយៈពេលជាង២ឆ្នាំប៉ុណ្ណោះ។ សិ​ស្សថ្នា​ក់ទី១​០នៃ​វិទ្យា​ល័យ ELT រូប​នេះ​ ​បាន​ចុះកិ​ច្ចស​ន្យាច្រៀ​ងចំ​នួន​៤ឆ្នាំ ៕ ប្រភពៈ Phorn Sophal