លោកឧត្ដមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង ដកហូតដំណែងលោក សន និល មកនៅការិយាល័យបុគ្គលិក ហើយបានតែងតាំងលោក ផាន់ ឡុង អធិការរងទទួលបន្ទកសណ្ដាប់ធ្នាប់ ឡើងជាអធិការស្ដីទី

បាត់ដំបងៈ នៅព្រឹកថ្ងៃទី២៨ ខែសីហា ឆ្នាំ២០១៨ ខ្ញុំបាទ រួមទាំងបងប្អូនក្រុមការងារមនុស្សធម៌ប្រចាំខេត្តបាត់ដំបង បានចុះទៅជួបសួរសុខទុក្ខប្រជាពលរដ្ឋរងគ្រោះ ដោយលោកអធិការស្រុករតនៈមណ្ឌល ចាប់ជំរឹតទាប្រាក់ នៅភូមិត្រែង ឃុំផ្លូវមាស ស្រុករតនមណ្ឌល ខេត្តបាត់ដំបង និងបាននាំយកថវិកាចំនួន ៥០មុឺនរៀល ទៅជូនគ្រួសារគាត់ដែលមានជីវភាពក្រីក្រ ។

បន្ទាប់ពីចេញពីជួបប្រជាពលរដ្ឋខ្ញុំបានឆ្លៀតមកជួបលោកឧត្ដមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង លោកឧត្ដមសេនីយ៍ទោស្នងការ បានអោយដឹងថា លោកមិនយោគយល់ចំពោះកំហុសឆ្គងរបស់លោកវរៈសេនីយ៍ឯក សន និល អធិការនគរបាលស្រុករតនៈមណ្ឌល ដែលធ្វើបាបរាស្ត្រនោះទេ។

បន្ទាប់ពីផ្ទុះរឿងអាស្រូវនេះ លោកឧត្ដមសេនីយ៍ទោ ស្នងការ បានបញ្ជាអោយលោក សន និល យកលុយមកប្រគល់ជូនជនរងគ្រោះវិញជាបន្ទាន់។ នៅរសៀលថ្ងៃទី២៧ ខែសីហា ឆ្នាំ២០១៨ លោកសន និល បានយកថវិកាចំនួន ១២០០ដុល្លារ ដែលលោកជំរឹតយកពីប្រជាពលរដ្ឋស្លូតត្រង់គ្មានកំហុសមកប្រគល់ជូនប្រជាពលរដ្ឋវិញ។

បន្ទាប់ពីលោកសន និល បានប្រគល់លុយជូនជនរងគ្រោះវិញ លោកឧត្ដមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង បានដកលោក សន និល មកនៅការិយាល័យបុគ្គលិក ហើយបានតែងតាំងលោក ផាន់ ឡុង អធិការរងទទួលបន្ទកសណ្ដាប់ធ្នាប់ ឡើងជាអធិការស្ដីទី បណ្ដោះអាសន្នរង់ចាំការសម្រេចពីថ្នាក់ដឹកនាំអគ្គស្នងការ និងក្រសួងមហាផ្ទៃ។

ពេលនេះលោកវរៈសេនីយ៍ឯក សន និល បានស្ថិតនៅស្នងការដ្ឋាននគរបាលខេត្តបាត់ដំបង ដើម្បីរង់ចាំក្រុមការងារស្រាវជ្រាវសាកសួរកសាងសំណុំរឿងសុំយោបល់ទៅថ្នាក់ដឹកនាំខាងលើ ៕